【職場奇行種】


27. 對質

日期:2017-02-09

Jerry急急帶著我走向老細的房間,我從遠處看到Ray笑意盈盈,並不像是Kinki描述的滿面通紅,更不像是處於緊張的氣氛中。

只見老細面容也稍寬,而房間內竟然不只是他們二人,有一個男人正背著我們坐在Ray旁。

Jerry似乎也察覺到這個狀況,輕聲地「咦」了一聲,我看著他的臉色竟然瞬間變成慘白,然後更發出了大大的呼氣聲,他似乎知道那個人是誰。

當我疑惑不已時,Jerry加快了腳步去到房門前,大聲地說:「Max!」那男人微笑著回過頭來,果真是Jerry的下屬,即是那耍手段令Betty被炒的Max。

Max在這兒做甚麼?為何Ray看來這麼高興,Jerry卻面如死灰?

「Jerry,我哋揾Max入嚟傾下偈,你唔使緊張。」Ray笑說,同時也看著我微笑了一下。

這時老細也開口道:「Jerry,原來Dukje個project,阿鐸有send email出嚟問你係唔係只send EDM畀同事,你重話係添,其他製作部同事都見到,我已經叫Max forward咗畀我睇。」

「嗯……不……不過係因為Ray提議話只畀開咗電郵嗰10%嘅人先,之後IT部阿傑亦提議只係畀同事,確保開電郵嘅百分比夠高……」Jerry大力吸了一口氣,然後繼續說:「我做管理層咁多年,我好尊重同事嘅專業,send EDM嘅事我當然想放心交畀IT同事做,又點諗到Ray同阿傑嘅idea會出事?呢啲嘢阿鐸都可以做證!」

Jerry說罷望向我,我望望Ray和Max,還未來得及開口,Max便先說:「其實我跟Jerry過嚟呢間公司,我哋做開雜誌,真係唔識EDM嘅嘢,不過見到阿鐸發出嚟嘅email,話只send EDM畀同事,我都好愕然,其實呢啲嘢唔係話識唔識IT嘅問題,係常識嘅問題,我估唔到Jerry會同意咁做,可能真係慣咗做雜誌,冇諗咁深入。」Max狠狠地從正面插了Jerry一刀。

老細說:「咁其實個idea係唔係Ray畀出嚟?我想聽阿鐸講。」

這時他們三人的目光都望向我,我想起Jerry剛才在pantry跟我說的話,上位?升職?嘿!我內心冷笑了一聲,開口道:「冇,我冇聽過Ray講,由頭到尾,都係得Jerry同我講;Jerry係project in charged,雖然當時我有面對面質疑過,但係最後當然都係要跟佢意思做。」

「阿鐸!」Jerry高呼起來,氣急敗壞地看著我。

「唔該,咁Max同阿鐸你哋可以出去先。」老細說。

我沒有看Jerry一眼便轉身離去;有時在職場中,即使有升職的機會,也未必會想要,人有時就是想當傻瓜。