【屎眼故】雞蛋與高牆


10. 結果

日期:2016-09-10

三小時後,我已身在科學園內的一間化學實驗所。

「阿達!」浩然熱情地向我走來。


「Hi!」我一臉尷尬地迎了上去,我和浩然在中學同班七年,他是高材生,中學畢業後便考到獎學金到德國留學,取得碩士學位後回港大展拳腳;雖說在香港搞科研並非賺大錢的項目,可是浩然就是這麼有抱負的一個人,他希望打破香港搞不起科研的命運,事實上,這些年來他的業務也確是愈來愈廣;反觀我呢?中學畢業後有感會計行業易找到工作,所以考不到大學的我便去讀了個會計文憑,也就是在哪段期間認識了阿珠的。身邊的每個人都好像在不停向上爬,我呢?好像在原地踏步;而跟浩然久沒聯絡的我,竟是為了這種事有求於他,也著實令我感到尷尬萬分。

「精神幾好嘛?」浩然慰問道。

「幾好,今次麻煩晒你。」我急不及待從背包拿出那卷廁紙。

「馬明!」浩然向著不遠處一個穿白袍的男生叫道。

那男生走了過來,他看一看我,便問浩然:「就係呢卷?」

「係,你拎去follow up啦!」浩然說。

「好。」那男生從我手上接過廁紙便離開了。

浩然拍了拍我的肩膊:「一定會盡全力幫你,你放心啦!」

我苦笑了一下,心底卻滿是感激:「今次真係麻煩你,一陣請你去飲茶好唔好?」


「唔使!呢件事對我嚟講好簡單嘅啫,唔……你預聽日下晝會有結果。」

「哦。」我再三道謝後便離開了。

果然,第二天下午,浩然便致電給我。

「阿達,報告出咗喇。」

「咩……咩結果?」我緊張地問。

「證實呢款廁紙含有甲醛,理論上廁紙係唔可以有呢種物質,而且……」

我感到自己仿如吸入了一口冷空氣,以致全身不停地顫抖,我抖震著嘴唇問:「而且乜嘢?」

我聽到他沉重的呼氣聲,然後是一句令我整個人僵住的說話:「甲醛係一級致癌物,如果濃度唔高,都尚且唔會有即時性嘅影響,但係呢卷廁紙每格嘅甲醛含量已有5千幾ppm,比指甲油嘅甲醛含量多7倍!如果大量或長期接觸,其實同去咗福島冇分別,一樣咁危險!所以……」


「所以我嘅癌症係由呢卷廁紙引起?」


「非常大機會,係由呢卷廁紙引起。」

雖然我設想過類似的化驗結果,可是當事實放在眼前,我還是極度震驚!果然,我的屎眼癌就是因這卷廁紙而起!

我內心一陣激動,以致久久未能說出一句。

這時浩然又再次提出幫忙:「我識一個喺鬼國嘅律師,佢係我表妹嚟,我轉頭WhatsApp佢電話畀你。」