【職場奇行種】


26. 夾口供

日期:2017-02-08

「頂!老細拉埋咗窗簾呀!」Kinki突發來訊息。

「吓?咁咪咩都冇得睇?」我說。

「妖!散場!」阿傑說。

究竟房間內發生甚麼事?老細要就Dukje的EDM問罪,而把EDM只發給那10%開過電郵的人這愚蠢的點子,確是由Ray提出的;但最終我們只發給了同事,卻是由Jerry決定的。況且,他是製作部主管,也是這項目的負責人,出了問題也該是由他承擔!不過,我當然也知道大部分仆街主管都是有責不負、有功卻領。

當我們擾攘討論了10分鐘,Kinki又發來了情報:「喂!Jerry衝咗出嚟,好似去緊你哋嗰邊,我見到Ray塊面超紅!」

「去我哋嗰邊?咩事呢?」阿傑說。

「我做咁耐都冇見過Ray面紅喎……」Google說。

「踏踏踏……」我們還未來得及討論下去,一陣急速的腳步聲傳來,Jerry衝了進來,而且直走到我面前。

「阿鐸,同你去pantry快傾兩句。」他邊說邊大力拉我起來,我只好茫然地跟著他。

到了Pantry,他壓低聲音說:「阿鐸,嗰日我咪提過想EDM只send畀開過電郵嗰10%嘅人嘅?」

「係吖。」

「其實個idea係Ray嘅,佢叫我同你哋講,明陰我!」他憤怒地說,可是他不知道,Ray其實不是暗算他,從Ray當日跟我說起時的自豪表情,我看出他真確信那是一道絕世好橋。

「係?我唔係好明!」我故作驚訝地回應他。

「你知啦!雖然我好有經驗,但我唔係IT人,唔識咁多EDM嘅嘢,我為件事好先請教Ray,點知嗰個idea原來唔掂,而家個客發晒爛渣!」他說。

我翻了個白眼,心中暗忖著這關IT甚麼事呢?根本是常識吧!我想就只有Ray和Jerry二人會以為這個愚蠢的點子可行吧?

「但,最後係你同意只send畀同事,都唔係用Ray嗰個方案……」

他氣急敗壞地說:「咁嗰個idea係阿傑提出嘅,我懷疑佢同Ray係夾埋!點都好,成件事係始於Ray畀錯咗意見我!」他頓了一頓又急速地道:「阿鐸,你知我同Aaron熟架啦!如果今鋪Ray揹咗隻鑊,我有辦法令你可以升職坐佢個位!」

我睨視著他,良久才道:「咁你想我點?」

「你果然係醒目仔,一陣我會同你入老細房,你如實講返個方案係Ray提出,話Ray都有同你講過就得!」

我緊抿著嘴唇沒有回應,他又道:「時間無多,我哋要過去啦!你記住,你只要幫我如實講一句,就可以升職加人工,呢個機會好難得。」

我對他笑了一下,然後點了點頭。

在職場上,不論任何原因,拒絕發展、升職機會的,都一定是冇腦傻瓜。