【職場奇行種】


24. 擦鞋

日期:2017-02-03

「Ray,雖然你咁講,但以Jerry咁霸道嘅性格,就算你幫佢諗咗好橋,佢最後都只會搶咗你嘅功勞,到時老細會覺得佢好做得嘢,我怕……我怕你地位不保。」我掩著良心對Ray說,我當然不覺得他教Jerry的是「好橋」,但是我更接受不了當愚蠢遇上更愚蠢的狀況,是以他們二人中,至少要鏟除一個。

Ray面帶微笑,似乎十分受落這一套,他搓了搓自己的下巴道:「唔使擔心,我係老細叔仔,Jerry點都郁唔到我嘅!我都知你哋夾佢做嘢辛苦架啦,不過……Jerry雖然能力有問題,佢始終唔係一個壞人又冇咩犯錯……」

我苦笑了一下,心想著難道愚蠢不是罪?

Ray似乎沒有留意到我的苦笑,逕自道:「至於Max同阿旺……」


「嗯?」我沒想他會提起這兩個人。

「佢兩個其實都係Jerry嘅跟尾狗,不過佢哋吠得重大聲過個主人,就真係要整治一下。」Ray邊說邊收起了笑容。

「雖然我係呢間公司嘅新人,但我做咗咁多年嘢,我只係提下你要小心Jerry,當然Max同阿旺都要提防,你係一個咁有實力嘅上司,我真係唔希望指揮我哋嘅人係Jerry。Google同阿傑少同你溝通,所以可能你唔知,我哋幾個都係睇你頭!」

 

其實我工作了這麼多年,總算學懂了適當的時候擦鞋,當然,事後感覺噁心是少不免的。

很多人面對老細上司時,總是以為對方在上、自己在下,其實這並不對;大家的關係是很平等的,上司用權力去操控你,你其實也可透過擦鞋等技倆去操控他;當然,用甚麼技倆就視乎對方是甚麼人了。

在Ray的神色變化中,我已察覺到我的說話起了效用,他道:「我都明白嘅,跟住Jerry又真係……我諗諗辦法幫下你哋,你畀啲時間我啦,總之唔使擔心,我會睇住你!」


我點了點頭,暗自偷笑起來。

與其奢望有一個好上司,不如期望有一個自己有辦法應付的上司;我怎也沒想過一番擦鞋說話之後,會為各人命運帶來翻天覆地的改變。