【職場奇行種】


23. 壞上司

日期:2017-02-02

如果你是我,你會聯合Jerry鏟除Ray嗎?

「喂?諗緊乜?」Google拍了我一下,我才從混亂的思緒回過神來。

「冇嘢諗。」我苦笑了一下。

「出去食lunch啦!夠鐘啦!」Google說,我這才發現已到午膳時間了。

我們擠進了茶餐廳,好不容易找到位子坐下,阿傑突壓低聲線說:「睇下嗰邊。」

我們立即望過去,原來Jerry、阿旺和Ray正一起午飯,看來言談甚歡。

「哇!好錯綜複雜,Ray唔係同佢哋不和嘅咩?」Google說。

「咪係!明明之前阿旺同Jerry想拉Ray落馬。」

阿傑和Google你一言我一語,我卻暗自抹了一把冷汗;如果他們關係良好,那麼我本來想要聯合Jerry鏟除Ray不但不會成功,更是自找麻煩。

我整個午餐都沒法集中精神,雙目不停瞄向Ray那邊;不知是我的心理作用,還是真有其事,當我仔細留意時,總覺得Ray面對Jerry、阿旺時,笑容是十分牽强。

當我不知第幾次瞄過去時,Ray的目光竟正好跟我對上!他發現了我!

他好像有點尷尬地別過面去,而我也不比他好,我只可不自然地移開了目光。

午餐後,當Ray回到公司,他走過來道:「入房傾兩句。」

「你見到我同Jerry佢哋食飯?」他甫在會議室坐下便說。

「係。」

「唔覺得奇怪咩?」

我聳了聳肩:「你哋高層嘅事,邊到我覺得奇怪唔奇怪?」

他笑了笑道:「我唔係傻嘅,佢哋係咩人我好清楚。」

我吸了一口氣道:「其實啲IT工作要夾佢真係唔可以,佢完全唔識但又指手劃腳。」

「都係嗰句啦!佢要攬啲嘢嚟做咪由佢,佢識做咩?遲早搞到一鑊粥!其實好多嘢你哋唔知,佢成日啲嘢唔識做又走嚟問我,佢都要忌我三分。」他自信地說。

「真係?」

「好似你哋搞Dukje個EDM,得10%人開個電郵,佢搞唔掂個客又走嚟摇尾乞憐咁,我咪可憐佢教下佢囉!」

「係?咁而家個方案係點?」我懇切地問。

「佢冇講你哋知咩?咪抽返有開電郵嗰10%人出嚟,下次只係發電郵畀佢地,開電郵嘅百分比咪會高囉!」Ray洋洋得意,我卻目瞪口呆。

原來這個愚蠢無稽的方案,不是由Jerry想出來,而是由身為IT部主管的Ray想出來!

當你遇上一個壞上司,不要覺得匪夷所思,因為終有一天,你會遇上一個更糟的。