【職場奇行種】


22. 敵友

日期:2017-02-01

兩天後,我們總算順利完成了Dukje的問卷,可是就如我之前預計般,有認真完成問卷且填上正確個人資料的人並不多。

篩走了假的數據後,餘下完成問卷的人只有200人左右,其中有些更是在Jerry强迫下完成問卷的同事。

接下來,我們也應Jerry要求,依據從問卷收集回來的電郵地址,發送了推廣電郵出去。

「點解得嗰10%人開個電郵架!」發EDM後的第二天,Jerry怒氣沖沖地闖進IT部。

 

「呢啲推銷電郵,10%咪算好多囉,有啲重係同事添!」阿傑想也不想便衝口而出。

「我應承咗個客要80%以上嘅人開,你哋死掂佢!」Jerry一臉怒氣。

「What? 80%? That is ridiculous!」 Google一憤怒又在說英語。

「Jerry,80%真係冇可能,你出去問任何做開EDM嘅公司,都唔會有呢個成效。」我一字一句堅定地說。

Jerry沉默了一會,才道:「我哋做嘢要變通,唔可以盲頭烏蠅咁!」

「So,  what do you think? Give us a method!」 Google氣急敗壞地說。

「我諗好啦!你哋抽出有開電郵嗰10%出嚟,下次只係發送電郵畀呢堆人,咪可以提升開電郵嘅百份比囉!」Jerry說。

「嗰度得好少人,而且開過今次電郵嘅,下次亦未必會再開。」我說。

「挑!你不如只係send畀同事,再叫佢哋開,咪有100%人開囉!」阿傑翻了翻眼說。

想不到這句氣話,Jerry卻滿意地回應:「Good! 就咁做,個客一定會好滿意!」

「What? 」就在Google張口狂呼時,Jerry已頭也不回地離去。

「喂!我講下佢當真?」阿傑目瞪口呆地道。

「唉!點搞?條友完全唔make sense……」Google終於轉回中文頻道。

「鬼叫佢而家喺公司上緊位咩?等我send個email叫佢確定係咁做先,唔係一陣出咗事佢唔認係佢嘅意思。」我聳聳肩道。

「其實可唔可以揾Ray幫手整治下佢?話晒Ray係老細個叔仔。」阿傑說。

「揾Ray?」我想起Ray的心胸狹窄,跟他聯合起來對我有利嗎?

這時候,我的腦海突然又冒出另一個念頭:「反正跟住Ray都唔太好,我應該聯合Jerry先鏟除Ray嗎?」

職場上,其實大部分人都各懷鬼胎,是敵是友,只是取決於對方有沒有利用價值。