【職場奇行種】


21. Ray的說話

日期:2017-01-26

「頂佢個肺,跌落地要拿返咋沙,本身三日,死都要扣我哋一日。」阿傑說。

「鐸哥,你好似唔係好緊張咁喎,唔通你有後著?」Google問。

我聳了聳肩道:「本身其實我預算要做一日半嘅,不過話三日諗住隱陣啲,而家兩日都ok嘅!」


「勁呀!有鐸哥,冇甩拖!」阿傑興奮地大叫,說時遲那時快,Ray也剛回來,聽到阿傑那樣說。

「咳咳!鐸哥,同你入房傾兩句。」Ray冷冷地道。

我看看阿傑,他伸了伸舌頭,似是預感有甚麼不好的事要發生。

在房間內,Ray微笑著說:「阿鐸,你都嚟做咗就兩個幾月啦可?」

「係呀。」

「點呀?做得開唔開心?你同Google、阿傑佢哋好似幾夾喎!」

「嗯,都做得幾開心。」我自以為以標準答案作答,怎料Ray卻突然板起了面道:「你都做咗嘢咁多年,我希望你知道,公司請你唔係畀你返嚟開心。」

他這麼說,難道我剛才應告訴他我在這裡工作得很不開心?他這回應令我一時語塞,是以我只能下意識地點了點頭。

「其實我就會畀你過試用期嘅,你呢段期間嘅表現都唔錯,聖誕party都好落力,希望你繼續畀心機。」

「嗯。」我著實不知該如何回應他才合他心意。

「不過……」他頓了一頓又道:「你要記住我係你上司,你要對我尊重。」

他這樣說,是因為剛才阿傑說「有鐸哥,冇甩拖」嗎?

我勉力擠出了一個笑容:「好。」

他接著又說:「阿傑份人做嘢麻麻,你要睇緊啲;Google就有啲小聰明,但都唔係咩人才。」

我保持著僵硬的微笑,我摸不清他想怎樣。

「總之,日後都希望你好好做。」

「知道。」我繼續强笑著。

離開了房間回到IT部,Google和阿傑急不及待發訊息來:「Ray同你講乜?」

「冇,佢話畀我過probation。」我當然不可以如實說Ray對他們的批評,畢竟這有可能影響他們的工作士氣,甚至憤而辭職,我才剛加入管理他倆,如果他們在這個時間突然辭職,難免會令人以為是我管理不善。

作為中層,要討好上層,又怕下層不開心,步步為營、兩面不是人。