【職場奇行種】


17. 震驚

日期:2017-01-20

第二天,也就是阿旺要Ray和Jack交證明文件的死線,昨天Ray說他會找老細傾談,我們著實很好奇到底最後誰會讓步。可是,即使我們向Jack打聽,他也似乎真的甚麼都不知道。

他一臉徬徨地道:「我真係交唔到咩證明文件,Ray都知我當年係喺黃金做砌機架啦!唉,今次我同Ray大鑊!」

我們都不知如何安慰他,只知Ray一整個早上都不在IT部。

「Kinki,有冇見過Ray?」阿傑按捺不住在群組中發了個訊息給Kinki。

「聽講佢一早返嚟就入咗老細房啦!」Kinki回覆道。

「頂,你唔八畀我哋知嘅?點做嘢架你?」阿傑說。

「今朝Jerry煩咗我成朝呀!係咁吹噓佢以前有幾勁,我跟佢做嘢幾幸福。」

「咁正?咁佢以前有幾勁呀?」我禁不住搭口問。

「佢話以前跟過好多大客嘅廣告喎,又喺大雜誌社做好多年。」

「雜誌社?我哋呢度主力做網上廣告同策略架喎,佢識唔識架?」Google也加入了討論。

「好明顯唔識啦!佢早幾日夾設計師整個網上廣告,佢鬧人話人唔識嘢、冇經驗,話整個圖連出血位都冇!」

「出血位?出血位係用嚟畀印刷機剪裁個設計圖,網上嘅嘢又唔使剪裁,要個出血位做乜?」

「就係囉,真係畀佢激到出血就真呀!」Kinki在這個訊息後不到半秒又再發了一個訊息來:「最新消息!阿旺同Jerry都入咗老細房!」

Ray、阿旺和Jerry都在老細房內,事情怎麼好像愈鬧愈大了?

我們幾個都如此緊張,想必Jack一定更是心急如焚。

但是,我們當然都沒法探聽房內的事,只可以靜心等候。好不容易過了半小時,阿旺突然來到了IT部,一副得意的表情說:「Jack你入一入會議室。」

與此同時,Kinki也發來了訊息:「佢哋三個頭先喺老細房出嚟啦!Jerry同阿旺個樣好得戚,Ray就死狗模式,垂頭喪氣咁行咗去。」

如此又再等了半小時,阿Ray都沒有回來IT部,倒是Jack垂著頭回來。

「Jack,咩事?」我、Google和阿傑幾乎異口同聲地問。

他茫然地抬頭說:「我今日last day,佢哋炒咗我。」

「What? Oh my god! What is happening?」 一向冷靜的Google突然爆出一連串英文,這也難怪他,任憑我們怎麼想,也想不到Jack會即日被解僱。

「Where is Ray?  Does he know that? 」Google在震驚之下,繼續說著英文。

「佢知,張解僱信有佢簽名,可能佢冇面見我冇返嚟啩!」他說完便低下頭執拾他的私人物件。

忠心,有人說是優點;但當你所忠心的人出賣了你,內心所受的傷卻是加倍的。

空氣中有一種令人不好受的氣氛,我暗自決定等Ray回來後,向他問個清楚明白。