樓下住咗個熱血保險佬


1. 保險佬,好恐怖

日期:2017-01-16

想講件真人真事,我以前住喺幢樓嘅頂樓,一層八伙,樓下20樓住咗條西裝友,每次佢一入lift都會好熱情咁同晒所有人打招呼。

其實我份人好冷漠,好怕太熱情嘅人,我好享受同人保持距離;但好不幸,因為我出門口時間同佢一樣,好多時部lift去到20樓停低,我都會倒抽一口涼氣,因為我知lift門一打開,就會見到西裝友親切無比嘅笑容。不過,好彩喺頂樓落到20樓之間嘅樓層,通常都會有其他人,佢一一同我哋講完早晨就會收聲。(你冇睇錯,佢唔係講一句早晨,係向每人講一句。)

而最恐怖嘅一次,係我喺頂樓等lift,lift門一開,條西裝友已經喺入面!我諗唔明,佢住20樓走上嚟頂樓做乜?係唔係上嚟跳樓?

當時我嘅眼神充滿戒心,而佢竟然笑笑口講咗句:「朝早遊lift河當做運動先!」

我承認我成個人扭成咗個O字,但之後諗深一層,佢講大話完全唔面紅,絕對同佢職業有關,因為佢正正係一個 保 險 佬!

由於當時lift入面得我同佢,佢好熱烈咁講完早晨,就問我有咩興趣,咁我好求其話最有興趣瞓覺,佢問我成日瞓有冇做body check,我話冇,佢就開始話要定期check同買保險……

喺短短一程lift入面,我好似經歷咗一世紀咁,直到有其他人入lift,佢都繼續講,唔知會以為我同佢好熟!

好唔容易捱到G樓,我好似跑馬出閘咁跑出去,佢竟然喺我身後大叫:「聽朝再傾啦咁!」

就係因為佢呢一句,我同佢展開咗他媽的不浪漫的緣份遊戲;第二日,我早咗十分鐘出門口, 見唔到佢,我好開心,我覺得世界好美好。

如是者過咗一星期,我又如常早十分鐘出門口,一路等lift一路玩tsumtsum,而lift門一開,佢 又 喺 入 面!佢重親切咁同我講:「咦!終於撞到你啦!你早咗出門口嘅?」

我好冷淡咁答:「係。」然後埋頭扮玩tsum tsum (其實玩唔到,因為lift入面上唔到網,而好死唔死當時我入lift前開咗排行榜,個畫面上有我個LINE ID)佢伸個頭嚟:「咦!我都有玩喎!你呢個ID?我add你畀心心你啦!」

我:「吓?」

佢:「唔使客氣!」

(吓?我唔係想多謝你喎!講咩唔使客氣?)

我震驚到講唔到嘢,好唔容易捱到G樓,我又一枝箭咁走咗,當然佢唔會放過我,我背後傳嚟佢嘅叫聲:「一陣就add你啦!唔好客氣!」佢係都要叫我唔好客氣。

5分鐘後,果然見佢add咗我,單純嘅我以為add咗LINE唔會太大問題,我唔覆佢咪得囉!

佢連續單機send咗「hello」、「我係你樓下個男仔呀!」、「畀咗心心你收唔收到呀?」、「隻魔法米奇好難抽喲!」、「你已讀不回嘅?」、「唔記得我係邊個?」

然後最搞笑係,佢跟手send咗張自拍照嚟,相入面嘅佢好萌咁做咗個V字手勢喺塊面隔離,再加句訊息:「我呀!20樓個男神呀!」冇錯,佢話自己係男神,但事實佢瘦到成隻蜥蜴咁。

當時我笑到痴線,但我醒唔起,line係可以打電話嘅,冇錯,我電話響起咗。

我收起笑容,好似接到午夜凶鈴咁望住個畫面,當然,最後我冇聽,加封鎖埋佢個LINE同刪除咗佢張相。

第二日,我比以前遲咗20分鐘出門口,我假設佢早10分鐘去遊lift河,大家相距半個鐘,應冇乜可能見到。
而事實,lift門一開,我唔見佢喺入面,架lift到20樓又冇停,我好放心;但當我踏出大廈,佢就喺門口,好熱烈向我揮手。

我冇應佢,一枝箭向車站跑去。

好彩呢次之後,佢就冇再煩我,不過間中見到佢都有同我打招呼,我就木口木面咁;直到半年後我搬咗,我先擺脱呢個咁老尷嘅場面。

我唔知點解佢會咁努力為咗張單,或者我應該欣賞佢嘅努力同熱血,但原諒我,我真係好怕生保,重好驚保險佬。