【職場奇行種】


12. 第一次交手

日期:2017-01-14

蠢人能學聰明,是非常罕見的事;蠢人成為上司,卻比比皆是。

由於Jerry已成為了IT部的上司,所以關於聖誕派對的事,也要跟他匯報。

在距離聖誕尚有個多星期的這天,Jerry召了所有IT部同事開會,向他匯報派對的安排。

「Ray,個禮物清單都好唔掂喎!」Jerry邊說邊把禮物清單搓作一團。

Ray的臉一陣紅一陣青:「咩意思?」

買埋咁多IT嘢,咩iPad、iPhone、智能手錶,你哋係唔係有私心?再講,你有冇幫公司諗過?應買啲平啲,而家呢度成三萬蚊,我只會批三千!」

「三千?公司一向抽獎都人人有份,三千蚊要買二百幾份禮物根本唔夠!」Jack說,我有點訝異於他原來不只是一個擦鞋仔,至少還會講「人」話。

「你哋做IT嘅人,最大問題咪就係唔識變通囉!以前人人有份,而家可以唔係,嗰啲返工未夠一年嘅人冇資格抽咪得,我就好公正嘅,我自己都未夠一年,阿鐸你唔會介意架可?」他竟邊說邊看著我。

我聳一聳肩:「冇所謂。」

「哇!好彩我夠一年唧。」阿傑笑得像個白痴一樣。

「好,我即時check咗,未夠一年嘅同事有73人,剩返嘅有136人,即係三千蚊除開平均一份22蚊。」Google眼看著Tablet冷漠地說。

「啱吖!嗱!買啲零食都係幾蚊包,買廁紙又得,你哋去超市買啦!人人都有屋企,一定用得著!」

阿傑翻了翻眼,壓低聲線在我耳邊說:「iPhone夠人人啱,佢估個個同佢一咁樣用老人手機咩?」

我瞄一瞄Jerry手中的手機,他確是在用一台老人手機。

Ray笑了笑,突然像是對Jerry十分順從,道:「冇問題,就跟你個意思去買禮物。」

Jerry面露勝利微笑:「當日食完嘢就抽獎,我想有個歡樂嘅氣氛營造出嚟,所以你哋揾個人拍片剪片,我想即時有得睇,好似人哋結婚啲早拍晚播咁。」

Google說:「你意思係IT部嘅人要負責拍片剪片?」

Jerry說:「梗係!呢啲科技嘢梗係你哋IT人做啦!用手機影得架啦!」

阿傑禁不住說:「喂!我哋……」話未說完,Ray卻大聲蓋過了他的聲音道:「我覺得Jerry嘅意見唔錯呀!就咁決定,Jack你負責拍片剪片。」

「知道。」Jack點了點頭。

Jerry仰起頭來又說:「除咗拍片,我重想你哋揾人影即影即有,即時將啲相掛上聖誕樹。」

「冇問題,咁我哋幫公司買部即影即有,喺當日用。」Ray說。

「唉!呢啲只用一次就唔好花錢買,你影咗立即用公司printer印出嚟,再剪返細張就可以啦!我真係希望你哋幫公司諗下。」Jerry的說話令我不禁翻了白眼。