【職場奇行種】


11. 團結

日期:2017-01-12

「唉!好慘呀!」下班的時候,我遇到Kinki,她一臉苦惱地叫著。

「咩事呀?」我問。

「我以後唔同你哋食lunch啦!」她噘著嘴說。

「點解?你同Jerry食呀?」我說笑著,但怎料她卻張大雙眼看著我:「你又知嘅?」

「唔……唔係開口中下嘛?」我嚇到了自己。

「唉。」我和她走在公司往巴士總站的路上,她先謹慎地四處張望了一下,才安心道:「Jerry痴撚線架!」


「咩事?」我著實抵不住好奇心。

她說:「阿旺宣布製作部食埋IT部嗰日,我咪同你哋細細聲講嘢嘅,然後畀佢話嘅?」


「係呀。」


「之後第二日,Jerry無啦啦叫我入房,『哦』咗我一餐!」
 

「吓?佢講啲咩?」

「佢話我唔應該喺個會度咁唔尊重佢,細細聲同其他team嘅人講嘢喎!佢話我哋入去係聽佢同阿旺講嘢,唔係叫我哋自己講嘢。」

「哇!重嚴過小學上堂!」

「重有呀!佢話以後我哋本身製作部嘅人要日日一齊食飯,以示團結……」

我不禁笑了起來:「咁你咪即係食晏都冇得抖氣?」

她嘆了一聲就:「咪就係……不過你哋放心啦!有咩八卦料我會即刻send訊息畀你哋架啦!你哋有嘢八都記得唔好漏咗我呀!」

我無奈地笑笑回應她。

想想Jerry真是老謀深算,進來公司不久便使計令Betty被解僱,然後找自己的朋友阿旺來做HR,繼而再跟阿旺合謀吞併IT部。

但Ray對這件事又好像不怎麼在意……不論如何,還是先依Ray說辦好聖誕派對,然後再看看之後有甚麼工作安排好了……

打工,最令人煩惱、不安的往往不是工作本身,而是千絲萬縷的人事關係;說白一點,就是那些賤人、仆街,令人心煩不已。