【職場奇行種】


10. 利用?

日期:2017-01-11

會議室內傳來一陣耳語,阿旺又道:「今次叫晒大家嚟,係想提升透明度,等全部人都知公司嘅安排。放心,我敢講今次調動一定令公司邁向更好方向。」

「拍拍拍」,突然一陣掌聲響起,是Jerry;他邊拍掌邊行到最前方,向著大家大聲道:「多謝Aaron嘅安排,IT部嘅同事唔使擔心,我會同大家好好合作,將我豐富嘅管理經驗同知識帶入嚟。」

「邊有人咁樣自己讚自己架?」阿傑低聲道。

「佢嚟咗呢兩個月,我日日都聽佢數自己有幾勁,你哋有排聽啦。」Kinki斜眼看過來。

「咩話?佢嚟咗只係兩個月?咪只係早我少少?」我說。

「咁快上到位,條友真係唔簡單。」Google邊說邊脱下了眼鏡抹著。

「Kinki?你同IT部同事係唔係有咩問題?歡迎問我架!」Jerry留意到我們在竊竊私語。

「冇呀,Jerry。」Kinki板著臉大聲答。

「冇咁散會啦!」阿旺說。

我們離開會議室回到IT部,Ray竟然若無其事地坐在他的座位。

「Ray!」Jack像是狗隻看見主人般撲過去。

Ray笑了笑看看我們,道:「做咩神色咁凝重?」

「Ray,Jerry佢……」Google開腔說。

Ray把身子向後倚著,提起手敲了敲桌子,良久才道:「我覺得咁樣幾好,大家都可以溝通得好啲。老細請Jerry返嚟都係想得到佢嘅經驗同知識,而家咁樣幾好吖。」

他頓了一頓又道:「你哋唔係以為我畀老細燉冬菇下嘛?」

我們沒有人敢答話,他事實是說中了我們的想法。

「哈哈!我係老細個叔仔,Jerry只係外人,我同老細夾埋利用佢架咋!」他一臉自信地說:「總之嘢照做,嚟緊我哋首要任務係將公司嘅聖誕派對搞得好好睇睇!」

「知道!」Jack大聲回應,我們其他人卻說不出一句話。

我不知道Ray說的話是真是假,到底是Jerry把Ray拉了下台,還是Ray利用Jerry? 為甚麼我們最重要的工作會是辦聖誕派對?

我沉默著回到自己的電腦前,這公司真的值得我待下去嗎?我應為了比市場高的薪金留下,還是再找一份工作?可是作為中層管理,確是高不成低不就,要找一份薪金、職位相若的工作談何容易呢?

有些工作,就是讓人食之無味,棄之可惜。我沉思了良久,還是決定先見步行步吧。