【職場奇行種】


9. 人事變動

日期:2017-01-10

會議室雖然大,但當所有員工都擠了進去,還是十分擠迫,我四處張望,看到Jack在右邊不遠處,他的神態看來有點緊張。

我用手肘撞了撞Google,向他示意Jack的位置。

他托了托眼鏡,壓低聲音道:「全公司都喺度,偏偏就冇咗Ray。」

「話時話,Ray成日都出去蛇王唔喺公司,真係死咗都唔知咩事。」阿傑也呢喃著。

會議室內每個人的神情都疑惑不已,但我突然發現有一個人流露出得意的表情,那是製作部的Jerry,即Kinki的上司,他為甚麼掛著這個神情?

這時阿旺走進來站在最前方面向我們;「刮刮刮」,他不自覺地又在抓頭皮,大量皮屑飄到了地上,會議室內眾人不禁交頭接耳起來。

「咳咳!」阿旺假咳了兩聲,眾人又再靜了下來。

他一臉胸有成竹地道:「各位,相信大家都同我個別傾過偈啦!我嚟到公司除咗好似過往嘅HR咁搞下招聘、處理下員工紀律問題外,都會檢視下公司同事嘅工作效率、架構,睇下點可以提升公司生產量、賺更多錢,所以今次叫大家嚟,係因為我就著同大家面談嘅結果,有咗第一步嘅人事變動計劃。」

「人事變動?」有人大聲提出了疑問,更多人只是耳語或沉默。

「大家放心,唔好咁緊張,我唔係要炒人。」他裂嘴而笑,露出一排啡黃色的牙齒。

不是要解僱人嗎?我不禁鬆了一口氣,但那天他指著Ray的名字又是甚麼意思?

他收起了笑容繼續道:「我檢視過每個部門嘅工作流程,其中製作部同IT部都要處理客戶嘅project,但係而家分成兩個部門,大家溝通上未必會好好。」

Google在我旁壓低了聲線道:「果然係想搞我哋IT部。」

阿傑也輕聲說:「條友想點呀?」

Kinki瞪了他們一眼:「咪嘈住晒,聽下條友講乜先。」

阿旺提升了聲線,好像生怕我們當中會有人聽不到:「我唔係講緊製作部同IT門嘅同事有乜做錯,我只係想個流程順暢啲,唔好再發生不必要嘅誤會。」

阿傑忍不住低聲問Kinki:「我哋兩個部門有誤會咩?」

Kinki突然似是在思考著甚麼,沒有回答阿傑。

阿旺面向我們這個方向道:「即日起,IT部同製作部會合併為一個部門,統一叫返製作部,Jerry係製作部阿頭。」

「咁Ray呢?」一把疑惑的聲音從我右面傳過來,是Jack。

阿旺古怪地微笑著:「Ray依然負責管理所有IT同事,但就要定期向Jerry匯報,呢層我會個別再知會Ray。」

辦公室,間中就會出現一些不知何故能水鬼升城隍的人,而這些,人偏偏又都特別喜歡侵略別人。