【職場奇行種】


8. 猜測

日期:2017-01-09

有些人,明明也只是打工仔,但對其他同事卻總是用一副老細的嘴臉。

我把和阿旺會面的情形也告訴了Google,好不容易等到阿傑回來,我們立即問他的情況。

「阿旺係唔係問你公司邊個最阻住進度?」我問。

「係呀。」

「咁你答咗?」這回到Google問。

「係呀。」

看著阿傑的回覆,我不禁莫名緊張,想必Google也跟我一樣,他立即傳了一個訊息:「你答咗邊個?」

「我答咗我自己囉!哈哈!」

「你short咗?一陣佢炒你呀!」Google說。

「炒咪炒,我最多揾過份工!」

我著實不知道阿傑是聰明抑或愚蠢,對阿旺的行徑也沒甚麼頭緒,唯一肯定的是,我對阿旺這個人完全沒有好感,他一副高高在上的嘴臉著實比他的頭皮和口氣更令我倒胃。

阿旺跟阿傑會面後,緊接著的是Jack,可是我們一向跟Jack沒甚麼工作以外的話題,自然沒能去打聽甚麼。到了第二天,Kinki的會面也是大同小異,而她竟以「以前HR最影響公司,而家Betty走咗,暫時唔覺得有咩問題」去回應阿旺。

往後的一星期,阿旺都在不停接見同事,我們留意到他幾乎全公司都傾談過了,除了兩個人,一個是老細,一個是Ray。

「其實阿旺會唔會想炒Ray?」數天後的午膳時間,我跟Google、Kinki和阿傑在快餐店聊著。

「唔會啦!Ray係老細個叔仔。」Kinki大口大口地吃著焗豬扒飯。

「咁解釋唔到阿旺人人都見晒,但偏唔見Ray同老細。」阿傑說。

「唔見老細唔出奇,呢單嘢一定係老細指使阿旺做嘅,但唔見Ray就真係有啲奇怪。」Google托著頭說。

「唉!我尋日重用美人計想套阿Jack料,點知佢冇理我;雖然平時唔熟啫,但一個好似我咁嘅大美人喺佢面前,佢少少料都唔爆下!」Kinki鼓著腮說。

「嘻嘻!唔好玩啦,Kinki姐!」阿傑邊說卻邊被Kinki怒瞪著。

「會唔會係老細同Ray一齊要求阿旺做呢件事,所以阿旺唔需要同Ray會面?」我問,腦海中卻又想起當日阿旺好像有意指向Ray的名字。

「呢個都有可能,但Ray又似乎未去到一人之下,萬人之上嘅地步,唔係都唔使啃咗個聖誕Party佢啦!所以話老細同佢一齊落命令,又好似有啲出奇喎!」Google說。

面對公司的風吹草動,員工往往有如一班探員,整合所有的蛛絲馬跡,圍在一起討論和推敲。當我們仍在亂猜一通,午飯後回到公司時,阿旺卻召了我們眾人到大會議室去,想不到一場令我大開眼界的事件就此展開。