【都市故】彩虹站多出來的路軌 2


5. 肥婆

日期:2020-07-09

我們搭乘白色的電梯來到車站大台,我立即就留意到月台中央有三件不是白色的龐然大物。

不,正確來說不應說是「三件」,應該說是「三個」穿著彩虹色芭蕾舞裙的大肥婆在手舞足蹈地轉著。

「係阿欣、阿宜同阿美!」象仔大叫著。

「吓,識得架?」阿亮問。

「係呀,佢哋咪就係人間嘅彩虹站入面,嗰三個跳舞嘅雕像囉。」時叔說:「你唔好睇佢哋咁嘅樣,佢哋並唔係鬼嚟。」

「唔係鬼?」我好奇地問。

「嗯,佢哋因為日夜操控鬼門關嘅列車有功,已經升咗級做彩虹女神,係比普通鬼更加高級。」時叔說。

「原來佢哋係負責操控鬼門關嘅列車?」我問。

「冇錯,當佢哋順時針轉時,列車就會駛入陰間嘅月台;相反,如果佢哋逆時針轉,列車就會開出返去人間。」時叔解釋。

「原來係咁。」阿亮說。

象仔走近阿欣、阿宜同阿美旁邊,我們便都跟了過去,一走近便聽到肥婆們一邊跳舞一邊在唱:「肉,全部都係肉!肉,全部都係肉!」

「乜首歌咁難聽嘅。」我喃喃自語。

「喂,」時叔突然把手擱了在我的肩膀上說:「你試摸下肥婆隻腳。」

我甩開了他的手:「痴線嘅咩,無啦啦摸人,一陣佢哋話我非禮點算?」

「唔係呢,你摸下先啦。」時叔說。

我看一看象仔,他沒有說話,只是聳聳肩。

「唓,摸咪摸!」阿亮雖然這樣說,但他只是伸出了食指向前想戳一戳。

「啊!」他驚叫了起來,因為他的手指竟然穿透了肥婆的腿。

我說罷也好奇地伸手出去,我的整條手臂穿過了肥婆的身體。

象仔解釋說:「當日我同時叔嚟到時,唔知道呢度係陰間,曾經以為呢啲係投影,後尾先知統統都係鬼,佢哋唔只睇唔到我哋,亦摸唔到我哋,當然,我哋都摸唔到佢哋。」

「吔吔吔……」聽見時叔的怪笑聲,我們都回頭看他,只見他好像很好玩似的穿過路上鬼魂的身體,還一臉得意的表情。

我和象仔不禁對視了一眼,然後不約而同地嘆了口氣說:「點解我哋兩個堂兄弟會識到時叔呢啲神經老頑童架?」

阿亮聽了也不禁笑了笑:「係命運呀!」

我沒好氣地說:「係呢,咁我哋而家要去邊搵我老豆、阿晴同埋阿亮嘅太太?」我問象仔。

他搖了搖頭:「我都唔知。」

「你都唔知?」我和阿亮高聲問。

象仔說:「時叔約我時,話佢有晒全盤計劃,叫我跟住嚟就得。」

我們三個同時望向仍在嬉鬧的時叔,原來我們接下來的旅程都要靠這個神經老頑童。

我大力地呼了一口氣,然後走過去從後拉住時叔的背包,讓他停了下來。

「吔吔,唔好意思,一時興奮咗。」他說。

象仔和阿亮也走了過來說:「時叔,我哋而家要去邊?」

時叔立即正經地說:「放心,我諗好晒架啦,而家我哋先去搵華叔。」

「華叔?」象仔說:「時叔你真係好醒,華叔成日幫新嚟嘅鬼,真係有可能會知道我哋要搵嘅人喺邊。」

時叔點點頭:「你重記唔記得華叔間雜貨舖喺邊?」

象仔搖搖頭,時叔見狀立即自豪地說:「跟住我啦!我就係人肉GPS時叔!我係一個超醒目嘅的士司機!」

 

*本故事純屬虛構,與現實的人物、地點、團體等無關。