屯門公園的咒樂


28. 姐妹

日期:2019-12-10

我聽到這裡就大致明白,是以我問小紅:「於是你哋成為咗佢好姐妹後,你哋就變成咗半人半章魚嘅……怪物?」

小紅眼眶冒出一泡淚,又開始把往事說出來。

原來她們三人想救嬸嬸,小鳳和媚媚又聽說可以懲罰那些負心的男人,便答應章魚說可以做牠的好姐妹。

章魚聽罷,顯得十分高興,便從嬸嬸屍體的嘴巴鑽了進去,雖然牠的身體龐大,但竟然都能整個進入了嬸嬸的體內。

眼前的情形雖然看來十分噁心,但是三人一心只想嬸嬸復活,也沒有其他想法了。

不久,嬸嬸果然張開了雙眼,然後精神奕奕地坐了起來道:「媚媚!你沒有事就好了!」

當下四人抱在一起大哭,嬸嬸突然變了聲調道:「今天起,我跟你們的嬸嬸共用一個身體。不過我見到嬸嬸本來壽命是八十歲,到那天時,嬸嬸的靈魂還是會死去,可是我也不能出來了,嬸嬸的身體就由我繼續使用。」

媚媚等人也淚流披面,深深相信章魚就是海神,嬸嬸是被海神救活,於是紛紛叩頭致謝。

然後,海神到海邊用手盛了一些海水,說:「你們要做我的好姐妹,來!快喝一口海水,你們都可以延長生命,追隨我左右。」

聽到這裡,我不禁生出疑問:「你哋有冇諗過,嬸嬸根本冇復活過?一切都係隻章魚假扮?」

小紅目瞪口呆地道:「我……我又真係冇諗過,我……我信大人唔會呃我哋。」

時叔嘆了口氣,又問:「隻嘢話延長生命,就延長咗成300年?」

小紅點點頭,我又禁不住問:「於是你哋飲完啲海水,就……就可以隨時將手腳變成觸手?」

小紅又點點頭道:「其實都幾好,至少變成咁之後,咁多年嚟,我哋都唔再畀人欺負,而且……媚媚同小鳳亦成功報復。」

「報復?咩意思?」我問。

小紅道:「我哋變成海神嘅好姐妹之後,就稱呼佢做『大人』,大人帶住我哋經水路游去唔同嘅村鎮,搵我哋老公嘅下落,我哋花咗半年先搵到佢哋,而小鳳同媚媚……」

牠愈說下去,聲音卻變得愈小,我不禁大聲問:「佢哋做咗啲乜?」

牠嘆了一口氣,繼續低聲道:「佢哋見到自己嘅老公已經同另一啲女人雙宿雙棲,嬲到殺晒佢哋。」

只見時叔面色蒼白,喉間又發出「格格」的怪聲,問:「咁……咁你老公呢?」

小紅連忙大力揮手,猛地搖頭:「冇!我冇殺佢!我更加求大人、小鳳、媚媚都放過佢哋!」

牠頓了一頓,帶著哭音說:「因為我真係唔捨得……」

時叔舒了一口氣道:「咁都好啲……」

我問:「佢哋報完復後,咁呢幾百年喺度做乜?」

小紅道:「佢哋真係好憎男人,不過男人有樣好處,就係面對美人,都控制唔到自己,為我哋大灑金錢,我哋咁多年嚟就係靠搵啲賤男人錢過活!」

「所以你哋就喺屯門公園唱歌,等啲男人畀錢?」我問。

牠點點頭。

「係咁,點解你哋要啲男人寫遺書再推佢哋人工湖?點解你哋要咁做?」我想起父親,情緒不禁激動起來。

小紅聽罷顯得十分驚訝:「你……你點知?」

我憤怒得整個人發抖:「我爸爸就係畀你哋殺死!」

小紅後退了幾步:「你唔係唔見銀包入公園搵,你係嚟查你爸爸嘅死!」

「冇錯,你係唔係要殺埋我?」我邊說邊按著那個載滿螞蟻的盒子。

「哼!好似你爸爸呢啲冇晒錢嘅男人固然抵死,而你呢個臭男人大話連篇,就更加唔死都冇用!」

時叔這時竟勇敢地攔了在我身前,關切地說:「小紅,唔好再錯落去,我唔想見到你錯落去,我會好心痛。」

我當下不只為時叔的勇敢而驚訝,也為他的虛偽而詫異。