魂歸


16. 尋人

日期:2019-05-24

「咁而家我哋要做啲咩?」Suki問。

「用下個腦諗辦法啦!唔通跳起yeah咩?」Lyle斜望著Suki。

「你個死光頭佬!」Suki怒叫著。

Alexendra沒有理會他們,冷靜地開口道:「而家我哋所知嘅資料,係阿發全名叫陳皇發,佢1977年,即係29歲嗰年搬入大興邨,同佢媽媽兩個人住,而佢哋住嘅地址有個『1』,即係一係11樓,一係11號門牌,一係1樓嘅十幾號門牌,但因為化化哋,都有可能係『7』……而我哋……」

「不如善用一下互聯網,我哋上facebook、討論區等貼晒呢啲資料出嚟,再加埋阿發張相,應好快有消息!」Lyle插口說。

「去邊搵阿發張相?」Alexendra問,Lyle轉過來一副陰險表情,然後伸出手指指向我:「You!」

「搵阿發又唔係搵我!」我很抗拒地說。

「呂瑰話你同阿發好似樣架噃!」Lyle哄過來說,呂瑰也忙著說:「差唔多一樣樣!」

「唓!你唔識計數都數下手指,而家阿發成67歲啦!我點都唔似呢個歲數啩?」我冷冷地說。

Lyle聽罷舉起右手食指左右揮動,口中發出「啐啐啐」的聲音,說:「枉你身為IT人,而家手機有app可以令你張相個樣變老架!嚟!」

我還未反應過來,Lyle已用手機拍下了我的正面!

「喂!你條……」話未說完,他把手機屏幕向著呂瑰問:「你估你個愛人而家係唔係呢個樣?」

呂瑰又不停流淚:「好老……佢好老……點解你會有阿廢張相?」

「唔係呀,呢個係我影咗阿廢,再用app整老佢個樣架,唔係真係你個愛人嚟!」Lyle試著解釋,但呂瑰卻一副不明白的表情,這也難怪,她又怎會明白這些新科技?

「OK!總之而家我哋就用呢張相貼上網,登埋啲資料,希望快啲有消息。」Alexendra大聲說。

「喂!真係用我張相?」我問,可是他們卻沒有人理我,而是埋頭各自拿出手機把資料貼到網上的不同地方,而呂瑰仍是一臉不解地看著。

才過了五分鐘,「噹」!「喂,我貼上個尋人群組有人留言!即刻入去睇睇先!」根叔興奮地說,其他人和呂瑰也哄了過去看。

Suki一字一句地把留言讀出:「呢張相一睇就知用app變老,而家啲人真係無聊,尋人都造假,好似啲大陸人咁!」

「咩好似大陸人?」呂瑰問,Suki立即說:「冇嘢!冇嘢!」

「我都話用app整老我個樣唔得架啦!Lyle你都冇腦架!」我斜眼瞪著Lyle,他卻一副嬉皮笑臉的樣子,道:「你個樣生得唔好,配合唔到個app呀!」

「你條死仔!」我吼叫起來。

「咁而家點呀?」Suki嚷著。

「你哋唔好嘈!」黃師傅霸氣地大聲喝令,我們所有人立即靜了下來。

「哇!黃師傅你同趙師傅一樣又正又有台型呀!」Lyle雙眼閃閃發亮地看著黃師傅。

Alexendra搖了搖頭道:「咁啦!雖然始終唔可以排除網上嘅尋人啟示都可能會有線索,但我哋唔可以等運到,要多方面去搵線索。」她頓了一頓,又道:「而家都好夜啦!黃師傅、趙師傅、Suki,麻煩你哋返去準備好尋人啟示,聽朝一早拎去印一千張;而其他人都休息先,我哋聽日會兵分兩路,黃師傅小隊負責喺大興邨附近嘅街上貼尋人啟示,而我哋其他人就去洗樓,聽朝我會準備好洗樓策略,有冇問題?」

Alexendra一口氣說完,眾人都被她的霸氣震懾,只管點著頭。

「聽朝十點,我哋喺返呢間屋集合,大家而家對對錶!」Alexendra說。