魂歸


3. 誤會

日期:2019-05-08

我向Lyle走前一步,指了指門口,對Lyle說:「佢喺出面……」。

Lyle臉色立時變得蒼白,Alexandra卻說:「原來你哋一早知佢喺出面?你哋做乜唔幫下佢?」

「嘩!渣姐你真係人美心更美,連呢味嘢你都幫!」Lyle壓低聲線說。

Alexandra疑惑地問:「咩呢味嘢?」

「鬼呀!」我小聲說。

「吓?」她望了望我,又望了望Lyle,然後大聲笑了起來:「鬼你哋個頭呀!明明係個人!」

「唔係呢……阿渣姐……」Lyle繼續壓低了聲音,但Alexendra卻沒有理他,轉到我身後一把拉開了大門。

「渣姐!唔好呀……」Lyle大叫著,可是已經太遲。

那小女孩仍在門外,可是這次她卻抬起了頭,她的五官……很正常,看來似乎不是鬼……

Alexendra把鐵閘也拉開了,且伸手拖著小女孩的小手,把她迎了進來。

「頭先我嚟時見佢喺樓梯瞓咗,我拍醒佢,原來佢住16樓,佢阿媽尋日話去11樓打牌,但成晚冇返,佢落嚟搵阿媽,但又唔知邊間屋,然後又發現冇拎鎖匙。」Alexendra沒好氣地說:「我問咗佢拎佢阿媽嘅電話……好彩尋晚冇遇到壞人,唔係都唔知點算!」

「嘩!壞人見到佢尋晚個樣都變好人啦!」Lyle按著光頭說。

Alexendra狠狠瞪了他一眼,對我說:「畀啲水、餅乾佢食下先,我打電話畀佢阿媽!」

「哦。」我回應著,便去廚房拿餅乾。

到我出來時,只見Alexendra剛放下電話,她說:「搵到佢阿媽,原來佢喺對面條巷,重打緊牌,佢而家過嚟湊返個女。」

「真係唔負責任!早知報警算!」我說。

過了數分鐘,小女孩的母親就來到我們家,她是一個肥師奶;甫一開門,小女孩立即撲到母親懷中大哭起來。

「唔好意思呀!個衰女打搞到你哋!」師奶笑著說。

我卻冷冷地說:「你疏忽照顧兒童,知唔知我哋可以報警?」

小女孩一聽到就哭得更淒涼:「唔好哇!唔好拉我媽咪!」

Lyle對那師奶說:「算啦!下次你唔好再係咁啦!」

那師奶聽罷急急腳自己拖著女兒離去。

當以為事情告一段落時,Alexendra卻發出了兩下咳嗽聲,然後瞇眼看著Lyle。

「咩事呀?渣姐?」Lyle後退了一步問。

「你尋晚驚到去咗同阿廢瞓?」Alexendra咬牙切齒地問。

Lyle卻嬉皮笑臉地說:「錯!係你隻佬驚鬼,要我入去攬實佢氹佢瞓!」

「你條友講咩呀?」我大聲吼叫起來。

Alexendra笑著說:「唔好嘈,去買餸啦!」

我放開扯著Lyle衣領的手,回應:「哦。」

對我們來說,這是一個看來愉快的星期六,我怎也沒有想到,一個不可思議的經歷將會發生在我身上。