篤姐短打


6. 原來我女友係野田妹

日期:2019-04-03

我係秋官,但同鄭少秋無關,純粹因為我個名有個「秋」字,啲朋友就咁叫我。
我女朋友叫Betty,同佢未同居之前,我哋已經拍咗兩年拖,到感情穩定落嚟,我哋上個月開始同居,我先發覺原來佢係野田妹。
點解我咁講?唔係因為佢彈琴叻,如果有睇過《交響情人夢》,就會知野田妹間屋係幾亂幾多雜物同垃圾,而佢身邊嘅千秋師兄係會忍唔住幫佢執屋,原來我唔係秋官,而係千秋。
Betty係一個打扮乾淨時髦嘅女仔,未同居之前,佢連出街都會帶濕紙巾抹下手,有時喺茶餐廳都會嫌人哋張椅污糟抹下,另外加上佢成日上網睇教煮嘢食嘅短片,所以我天真咁以為,佢一定係一個鍾意做家務同煮嘢食嘅女仔。
但係,我錯啦!重錯得好離譜!
「食飯啦!」
當我哋同居一星期後,Betty終於喺呢度煮第一餐飯畀我食。
我懷住興奮步心情彈去餐枱,我真係驚呆咗,因為我眼前係兩碟黑色嘅餸!從外觀上,我根本唔知嗰兩堆係咩嚟。
「BB,呢啲咩餸?」我問,我感覺到自己嘴唇都震埋。
「係奇異果煎雞翼同埋朱古力炒菜呀!係唔係好勁呢!快啲食啦!」佢一路講一路遞碗飯畀我。
我捧住碗飯望一望,我諗叫碗嘢做粥會合理啲。
就係咁,我每晚都會食啲好奇怪嘅嘢,雞翼魚蛋湯係必須嘅,我目前食過嘅重有白飯魚涼拌草菇、橙汁粥、米粉炒飯、士多啤梨豬紅等,而最離譜嗰次,係我食到啲嘢有苦味,原來佢話見我頭痛又唔肯食藥,所以加咗一粒止痛藥落去一齊煮……我覺得我一直在玩命。
而重點係,Betty自己晚餐食好少嘢,因為佢要減肥,所以大部分劣食都係我食。
不過,由於我深愛Betty,所以我唔會對佢發脾氣,於是我同佢講唔想佢咁辛苦,以後我會負責煮。
但係,我嘅惡夢冇完結,因為佢除咗係黑暗料理天王,佢做家務嘅能力亦相當低,例如……
「BB,收衫啦。」我指指掛喺窗花嘅衫褲講。
「好呀!」佢好爽快答應咗。
過咗半個鐘,當我行過個窗,我見到佢真係收咗衫,但冇收褲。
又例如……
「BB,洗碗啦。」我話。
「好呀!」佢又好爽快咁答應咗。
然後第二日當我要用碗時,我發現碗上面重有幾粒飯。
又例如……
「BB,摺衫啦。」我話。
「好呀!」唔使多講,佢又答應咗。
最後我見到啲衫係搓成一團垃圾咁塞咗喺衣櫃。
即使係咁,因為我愛佢,我決定由我做晒啲家務,直至有一次,Betty個大學roommate阿珊上嚟玩……
阿珊見到間屋,突然講咗句:「Betty你果然係家務達人,以前住hall間房啲家務都係你做晒,而家又打理到屋企咁乾淨。」
What?Betty係家務達人?
我好震驚咁望住阿珊,然後Betty好快拉咗佢入房打機,留低我一個人喺廳。
呢件事一直喺我心入面,日日夜夜都令我好疑惑,不過天惘恢恢,一次中學同學聚會,我發現同學阿強原來係阿珊男朋友。
「聽講阿強有新歡喎!」阿堅爆料。
阿強即刻好得戚拎部手機出嚟show女朋友張相,而佢女朋友就係阿珊。
「條女幾索喎!你真係蠱惑啦!」阿堅話。
阿強袋返手機話:「啲女人重蠱惑呀!我女朋友最近同我講佢大學個roommate……」
大學Roommate?咪即係Betty?
「點呀?點呀?」
「佢話個大學roommate唔滿意個男友,明明大家都要返工,但自己就成日要做家務同煮飯,所以特登煮啲垃圾出嚟,做家務又做到勁差!」阿強話。
「哇,咁個男友有冇中計?」阿堅問。
「中晒計啦!」我自言自語。
諗返,我當初的確係旨意晒Betty收工做家務,但係而家就變咗我做晒,公平咩?公平咩?