Momo


6. 報復

日期:2019-03-18

「哈?」她給了一個奇怪的回覆,我才發現原來我上一句回覆有點辭不達意,我是她的朋友,我怎會叫她去死呢?
「你想死嘅話,不如試下從個醜女手上搶佢返嚟先。」我試著把話說清楚。
「點搶?」她問。
「我冇試過畀人搶男朋友,我都唔知,但只要你諗到有咩方法,我都會支持你。」我回應。
過了一會,她發來了訊息:「你真係好好人。」我在已完全漆黑的房間中笑著回應:「因為我哋係朋友。」
過了五分鐘,她的回覆傳來了幾張照片,這幾張照片令我不禁面紅耳赤。
「係friend先畀你睇,呢啲係我之前喺我條仔部手機揾到,係個八婆啲裸照。」
「等等,佢哋竟然發展到呢個地步啦?出面咁多男仔唔搵偏要搶人男友,醜女真係唔知醜字點寫!」我花了點時間輸入這個回覆,雖然沒有被搶過男朋友,但被背叛被騙的感覺,我懂。
「呀!我諗到方法啦!」她道。
「嗯?」我好奇。
「等我一陣。」她回應。
我終於站起來把屋內的燈都亮起,然後我還煮了兩碗麵,一碗給自己吃,一碗給我的寵物。
噢,我忘了說,最近我養了隻寵物,是我在街上撿回來的小貓,牠很瘦弱,平常我都讓牠住在媽媽的房間,反正媽媽走後,我其實也不太願意進去。
我打開了少許房門,把盛著麵條的碗放了進去,然後關上門。
其實我不知道貓咪吃不吃麵條,反正牠餓了的話,甚麼都要吃,要生存正是要如此。
我捧著碗返回客廳,瞄了瞄電腦熒幕,堅系樂怡還未回覆。
我坐在梳化上,想著這幾天發生的事,思緒有點混亂。我想交朋友,郤被出賣了背叛了欺騙了,到我振作過來,想再交朋友,郤遇上了也是被背叛的堅系樂怡。我有點同情她有點明白她,但是我不知道如何幫助她,與此同時,我又害怕她跟我說的一陣其實都是假的,就像陳家樂般是騙我的,所以我又充滿著戒心。
等我吃完最後一口麵,她才終於在回覆中給了我一個網址。
我倒抽了一口氣,慢慢移動滑鼠點進去,是一個討論區帖子,上面貼滿莪系芝蕫的裸照和個人資料。
「我要揚晒佢啲衰嘢出嚟,等人人都知佢咁淫賤!」
原來要報復背叛你的人,就是去背叛他。
她繼續傳來訊息:「人人都睇晒佢全相,我就唔信我條仔重要佢!」
「唉。」我嘆了一口氣,先不說我沒有陳家樂的黑材料,即使有,我的善良也令我沒法背叛他。
不過,她已經把照片都貼上網了,事已至此我也沒能說些甚麼,我只是回覆她:「希望你男朋友快啲返嚟你身邊,有新進展記得講我知。」
「一言為定。」她說。
「你要記住,我哋係一見如故嘅朋友。」我說。
「嗯,夜啦,我都要瞓啦。」
我笑了笑,輸入了回覆:「試下早啲起身,傳說4:20起身嘅話,會有好運喺你身上發生。」
「真係?」
「真係。」