鎖羅盆村4 號


4. 傳聞

日期:2018-07-29

「有個咁嘅地方嘅咩?個名咁怪嘅?」我疑惑地問。
「有,重係出晒名啲人話有鬼嘅地方,我之前寫小說時研究過下先知咁多,你呢啲番書仔唔識都唔奇。」
「有鬼?」我怪叫了出來。
「咳咳!」渣姐咳嗽了兩聲,道:「你哋兩個當我死架?我重喺度架。」
我堆了個笑臉:「係嘅,渣姐,我即刻做嘢,唔會畀你難做。」
隨著她的高跟鞋聲遠去,阿廢開始壓低聲線跟我說起鎖羅盆的事。
原來鎖羅盆是在北區一個叫荔枝窩的地方附近,亦鄰近熱門行山路線烏蛟騰至鹿頸之間,以前的名字是「鎖腦盤」,這個地名聽起來真的有點可怕。
關於這個地方,有很多鬧鬼的傳聞。
有說在幾十年前,有人到村內慶祝太平清醮,怎料去到時,整個村都竟然空無一人,所有村民都不見了,但離奇的,是那人發現一些屋內的桌上還有溫熱的餸菜,甚至有些食物已被吃了一口,村民就好像突然消失了一樣。
而且,因為那裡是很多行山者會經過的路段,有行山人士指每到鎖羅盆時,指南針就會失靈。甚至有資料說,曾有去附近露營的人好奇走入村內,之後卻失去聯絡,同伴發現等極不見他回來,就入村搜索,最後發現那人時,那人已死掉,而且死狀相當詭異,雙膝下跪,面容痛苦。
又有著名靈異研究者調查發現,在數十年前,鎖羅盆村旁有一個牛屎湖村,村民乘船出外參加婚宴,回程時船隻發生意外,船上大部分人都死了,自此有鬼的傳說不脛而走。
「哇,使唔使咁猛呀?」我聽後道。
「不過……」阿廢若有所思。
「不過乜嘢?」
「你只係發夢,其實好小事,冇必要去探究。」
「我明,你知我一向都唔會在意啲雞毛蒜皮嘅事,只係……唔知點解呢個夢令我好在意,而且我從來都唔知香港有個地方叫鎖羅盆,但又竟然發夢夢見呢個地方,你唔覺得好出奇?」
「咁你想點?」
「我想去一次鎖羅盆睇下。」
「吓,你唔驚?」
「唔驚,你知我對鬼神嘅嘢一向唔太驚。」
「咁……都好嘅。」
「而且有你同我一齊去嘛。」
「吓,我驚喎。」
「咳咳。」不知何時,渣姐竟然在我們身後,她又發出了兩下假咳嗽。
「得得得,做嘢吖嘛!」我道。
「你呀,唔好搵Fred去嗰啲地方。」
我望向阿廢:「你唔係聽啲女人講嘢,背棄你啲兄弟下嘛?」
「兄弟?我得一個細佬,佢今日放假應該喺屋企湊緊仔。」他作出了一個狡猾的笑容。
「得!」我翻了個白眼:「老婆奴阿廢!Shame on you!」