【假人真事短篇】塔門露營


3. 結局

日期:2018-06-10

 

當眾人被嘉兒和正太的說話嚇得目瞪口呆之際,他們兩人卻相視而笑,阿恒白了他們一眼道:「唔等我哋返嚟,而家重整蠱我哋!」

Brian也說:「離晒大嫂呀!」

嘉兒和正太大笑了一會,然後才道:「對唔住呀,尋晚等你哋嗰時,真係突然眼瞓得好緊要。」

這時,昨晚表現奇怪的Clive道:「嗯,尋晚食嘢時,我都突然眼瞓得好緊要。」

霆鋒道:「而且平日你一向多嘢講,尋日你突然變到好靜,好少嘢講。」

「眼瞓吖嘛,係人眼瞓都少嘢講架啦。」Clive 道。

「點只少嘢講?你重無啦啦半夜急屎,要我哋陪你去廁所,沿路又粒聲都唔出。」Brian 一邊把帳幕收起一邊說。

「我要你哋陪我去廁所?」Clive一臉不解地說。

「唔通你唔記得,尋晚你突然話要去廁所,而且我哋重陪你行咗好耐,去完返嚟你又嗱嗱聲瞓咗啦。」阿恒道。

Clive 苦思良久,依然說:「我真係一啲都唔記得喎。不過,我而家就算瞓醒都重係好似好攰,好唔夠瞓咁。」

「其實你尋晚真係好恐怖。我哋諗你係唔係……撞邪。」霆鋒道。

「撞邪?」Clive 疑惑地道。

「邊有撞邪呢啲嘢架?Clive 你係唔係一向有夢遊?」阿恒把帳幕收好後,揹上背囊。

「夢遊?夢遊就冇,不過講起撞邪,我尋日一到塔門冇幾耐,就突然聽到有把聲好似喺我耳邊講:『你做乜踢我呀?』不過當時我周圍望都唔見人,咪冇理囉!之後我就覺得好凍又攰啦。」

「聽人講,塔門好多金塔,你會唔會係踢到啲金塔自己唔知呀?」正太問。

嘉兒道:「我識得一個師傅,不如出返市區之後,我帶你去見下佢,睇下佢有乜意見?」

Clive 點點頭:「都好。」

到達市區後,嘉兒和正太帶Clive 來到一幢唐樓,走了五層樓梯,抵達一個單位。

他們還未按門鈴,門已打開,一個男人站在他們面前,道:「係唔係搵我?」

嘉兒高興地道:「森美大師真係料事如神。」

正太指著Clive道:「森美大師,佢好似撞邪呀!」

森美大師眉頭深鎖看了看Clive,道:「小問題啫。」

Clive緊張地道:「我……我真係瀨咗嘢?」

森美大師連門都沒讓他們進,道:「小問題啫。嚟緊幾日朝早十一點到下晝三點,去烈日之下暴曬,就可以補充返啲陽氣。」

過了幾天,正太打電話給Clive:「 點呀?你有冇好啲?」

「好恐怖。」Clive 壓低聲音回答。

「咩事呀?森美大師個方法唔得咩?你重係畀鬼搞?」正太緊張地問。

「唔係,真係好恐怖。」Clive 又再重複說道:「我真係冇經歷過咁恐怖嘅事。」

「你快啲講啦,咩事呀?」

「唉,鬼就冇啦,我聽嗰個森美大師講完,我咪去曬囉,曬到傷晒,甩晒皮呀!我從來冇試過甩咁多皮架!你話恐唔恐怖?」

「……」

篤姐按:「邊有咁多鬼,咪鬼咁迷信!」