【假人真事短篇】塔門露營


1. 害怕陽光

日期:2018-05-26

當假日的市區被行李箱和大媽迫爆,很多年輕人在假日時都會選擇到郊外活動,而這件事的主角Clive也一樣,可是這個本應開開心心的郊外之旅卻為他帶來一次惡夢。

Clive約了朋友阿恒、Brian、正太、嘉兒、霆鋒一起到塔門露營。塔門的風景很美,藍天碧海,還有一大片草地,青翠的草地上有一群黃牛在緩慢地散步。

「好正呀!嚟到呢度好似去咗外國咁!」Brian伸了個懶腰。

正太和嘉兒這對情侶牽著手在後面慵懶地走著。

「唉,最衰王菲要返工,唔係我都想帶佢嚟呀!」霆鋒看著前方的正太和嘉兒,心裡不禁想起女朋友王菲,事實上,「霆鋒」和「王菲」都只是他倆的花名。

這時,阿恒突然察覺到一點異樣,他望向跟在最後的Clive,總是覺得他跟平常有點不同。

只見Clive皺著眉頭一臉辛苦的走在後方,還用一隻手放在額前遮擋陽光。

「Clive,你係唔係唔舒服?」阿恒問。

Clive搖搖頭,卻沒有開聲回應。

「你係唔係中暑呀?」Brian也回頭問。

「唔係,我一啲都唔熱。」Clive的語調很冷,跟他平日判若兩人。

「咁你做咩擋住太陽?你平時最鍾意曬太陽架啦。」正太問。

Clive又搖搖頭,道:「我都唔知點解,突然好怕陽光。」

這時,貼心的嘉兒從背包取了一把傘出來遞給Clive,說:「反正我戴咗帽,借你擋下太陽啦。」

Clive點點頭接過傘子並打開,沒有陽光的直接照射,他終於感覺舒服一些。

事實上,這天的陽光不算太猛烈,他們走的地方很多時都有樹蔭遮掩,Clive自己也不明白為甚麼會突然這樣怕陽光。

他們看過日落,Clive終於覺得精神回復了點,大夥兒便跑到草地上開始紮營,然後烹煮著帶來的食物。

「一陣瞓之前早少少要去下廁所,如果唔係,半夜行返去廁所條路又遠又黑架。」阿恒提醒大家。

Clive點了點頭:「嗯,我都有啲攰,我一陣會早啲瞓。」

霆鋒咬著牛排問:「你真係冇事?」

「冇事,去埋廁所等我一覺瞓到大天光就冇咁攰架啦。」

「其實你係唔係急屎啊?」Brian問,Clive卻只是白了他一眼沒有開聲回應。

天色終於完全暗下來,繁星在這個離島上空閃耀。

「好啦,我哋去廁所啦。」正太說著拉起坐在草地上的嘉兒,於是一行人便步行了十分鐘往廁所,而Clive依然是沉默的跟在後面。

當他們回到營地時,四周已愈來愈多帳幕架起,他們坐在自己的帳幕前看著星空聊天,Clive卻自顧自回到帳幕裡睡覺。

「你哋覺唔覺得Clive今日好怪?」嘉兒輕聲問。

「係,但佢又話唔係唔舒服……」正太也壓低聲音說。

「我覺得佢……」嘉兒欲言又止。

「覺得咩呀?」霆鋒問。

「我覺得佢好似面色好黑,就好似……」嘉兒欲言又止。

「好似撞嘢咁。」正太道。

「唔會啩?」Brian說著詫異地回頭看看帳幕,然後道:「今晚我同佢同一個營,會唔會有事架?」

「邊有咁多鬼呀?唔好諗咁多。」阿恒故作鎮定地揮了揮手,可是眉頭卻是緊皺著。

「嗯,其實都夜啦,其他嚟露營嘅人都瞓晒,我哋都瞓啦。」霆鋒急急站起來向自己和阿恒的帳幕走去。

Brian也只好轉身拉開帳幕,正當他想爬進去時,卻被眼前的景象嚇得驚叫起來。

「哇!」Brian邊叫邊連滾帶爬地跌出帳幕外,其他人都被嚇得停下了腳步。

「咩事呀?」正太大聲問。

「Clive佢……Clive佢……」Brian指著帳幕,面色鐵青得可怕,嘴巴沒法說出一句完整的話來。

待續