如果可以早點認識你,那就好了。


13. 男人就是抗拒不了主動的女人嗎?

日期:2018-02-21

張家敏跟李海棋說起陳澄澄。

「小心啲佢呀!一陣搶咗你男朋友呀!」李海棋說。

「不過佢哋都唔係成日會一齊打波,我諗唔怕啩。」

「到要怕時已經太遲啦,冇男人抗拒到主動嘅女人。」不知何時開始,李海棋好像變得很了解男人。

「我諗……邱凱明唔係呢種人。」張家敏有點猶豫。

「唔好咁信男人,而且陳澄澄比你可愛咁多。」

「吓!搞錯,乜你咁架?」張家敏噘著嘴。

李海棋吃吃笑:「都係講實話啫,其實好多男仔鍾意陳澄澄架,佢呢啲類型好得男仔歡心,但偏偏佢就鍾意你個邱凱明啫。」

「咁咁咁……咁點算好呀?」張家敏愈聽愈無助。

「如果陳澄澄真係老是常出現,咁你真係要痴實啲邱凱明先得啦。」

「痴實啲?」

「係,由朝痴到晚。」

張家敏留意到,陳澄澄果然老是常出現,每次邱凱明打籃球時,她就會一起玩,他總是來者不拒。

男人就是抗拒不了主動的女人嗎?

運動細胞等於零的她總是站在一旁看,她好羨慕陳澄澄。

「嗨,不如放咗學我陪你打一陣籃球。」小息完結時,張家敏對他說。

「吓?」邱凱明似笑非笑地看著她:「你出名係運動白痴嚟架喎。」

張家敏打他,道:「咁你教我囉。」

邱凱明忍不住笑笑摸摸她的頭髮。

到了放學時間,他們來到屋邨的籃球埸。

「手咁樣擺,咁樣扔個波上去。」

張家敏雞手鴨腳地依邱教練的指示去做。

「腳唔好咁,你要對腳同對手配合。」

張家敏吃力地試著做。

「你隻腳點解慢過個身架?你隻手又快咗。」

張家敏覺得自己簡直是智障。

「你隻手腕要用力先得架,唔好軟皮蛇咁。」

張家敏已滿頭大汗。

「再嚟!練到做到為止!」

張家敏看著眼前的魔鬼教練,有點後悔。

「七點半啦,不如食嘢先。」張家敏撒嬌。

「練多陣,起碼做到呢個動作為止。」他邊說邊示範。

她硬著頭皮再試,卻不知為何心情變得很糟。

時間又過了半小時。

「做好啲手腕動作,重有對腳仍未配合。」

她突然停下了動作,任由籃球掉在地上,噘著嘴道:「夠啦。」

他疑惑:「唔係你話想學嘅咩?」

看著張家敏嬲怒的表情,他的心情變得很糟。