如果可以早點認識你,那就好了。


8. 有些感覺是在沉默中滋生。

日期:2018-02-12

張家敏無言以對,事實上,她和邱凱明擔心的事確在兩星期後便應驗了,但是李海棋像是沒事兒一樣,到底是她被施子健玩弄了?還是施子健被她玩弄了?張家敏都搞不清楚,她只知李海棋很快又跟另一個男生一起了,這次是一個低她們一級的男生。

「睇嚟你個好朋友都係食家。」邱凱明說。

張家敏皺皺眉:「或者……佢哋根本係同一種人。」她頓一頓,道:「我去三樓圖書館睇一陣書,拜拜。」

「睇書唔啱我,我去打波。」邱凱明揮了揮手。

張家敏轉身離去,她不知道有雙眼睛在背後看著她。

她沿樓梯走到三樓的學校圖書館門前,一隻手拍了拍她的肩膀。

「咁啱嘅。」是施子健。

「噢……嗨。」張家敏一時反應不過來。

「你去圖書館呀?」他問,他們現在就正正是在圖書館門口。

「嗯,想借啲書。」她覺得有點不自在。

「聽海棋講,你中文成績好好,有冇咩書可以介紹畀我?我都想再認真啲準備會考。」

「你同海棋唔係……分咗手咩?」

「係,不過我同佢和平分手,所以重係朋友。」

「哦……」

「你知啦!海棋咁貪玩,我都係想搵個可以同我一齊進步嘅女仔多啲。」施子健說著伸手拍了指張家敏的頭頂。

張家敏能到臉頰在發燙,正當她不知如何應對之時,突然聽到邱凱明的聲音在耳邊出現:「喂,張家敏。」

張家敏見到邱凱明,不知為何有一種安心的感覺。

「你唔係去打波嘅咩?」她整個人都轉而面向著邱凱明。

「係呀!發現冇人幫我排隊買水,所以都係叫埋你落去。」

「唓!」張家敏雖然如此回應,但心裡不知怎的鬆了一口氣,她道:「好呀,我幫你去買。」

「噢,咁下次你再介紹書畀我睇,或者放學之後我哋可以一齊溫書呀?」施子健說。

張家敏禮貌地微笑一下,然後跟在邱凱明身後走了。

「我救咗你一命,請我飲嘢。」他們很快來到小食部。

「唓,你冇錢先落嚟搵我借之嘛!」她噘嘴。

「你估我真係冇錢咩?」他從校褲口袋拿出了五元。

「咦?」她好奇:「你有錢又嚟搵我?」

他一臉尷尬地看著她,她一臉好奇地看著他。

有時候有些感覺,就是在沉默中滋生。

「阿妹!阿仔!係唔係買嘢?」小食部阿姐大叫,打斷了他們的對視。

「係……係……呀……」張家敏一時回不過神來。

「一盒荳奶,一枝水。」邱凱明說著把錢遞給了阿姐。

「唔係我請你咩?你救咗我一命。」張家敏接過荳奶。

「費事你又以為我冇錢先搵你。」他說著學施子健伸手拍了拍她的頭頂。

她臉頰像火燒一樣,他縮了縮手,尷尬地說:「小心啲隻獅子。」