意外愛上你


31. 童年

日期:2017-08-31

根叔快步過了馬路,留下了我和Alexendra在酒樓門口。

我看著Alexendra:「我都唔係好熟大興邨,好似你熟啲喎!」

她爽快地回應:「去商場行下。」

大興商場雖然也是領展商場,可是因為已是三十多年前的屋邨建築,跟其他新式的商場有很大分別,大興商場沒有冷氣、電梯,只有兩層,下層是街市和一些餐廳,上層有各種店鋪,分佈在長長的商場走廊兩邊,而在我來看,有些店鋪仍保留了以前的風味。

我倆沿停車場前的樓梯來到二樓,Alexendra突然說:「咦?曾記呢?」

「咩曾記?」我問。

她指著前方道:「呢度本來係文具鋪嚟,以前買親文具都係嚟呢度。」

「係?我諗好多嘢都變晒啦!」

我們轉了個彎經過一間五金店去了對面的走廊,那裡有一間士多,門口竟有兩台Yes!扭卡機!回想起來,Yes!卡應是我小學時期同學們寶物,只要投入一元,扭卡機會隨機跌出一張明星卡,卡面是當時流行的明星照片,有時還有閃卡效果,而卡背是那明星的資料或所唱流行曲的歌詞。

「嘩!部Yes!機重係收一蚊一張卡咋!真係時光倒流咁!」我不禁有點興奮,說罷從褲袋掏出一些硬幣。

「咩嚟?」Alexendra卻滿是疑惑地看著扭卡機。

我難以置信地看著她:「Yes!卡喎?!」

「咩係Yes!卡?」

「有明星個樣,後面有歌詞嗰啲喎!」我試著解釋給她聽。

「哦!我記得,見過同學有!」她好像恍然大悟般瞪大了眼睛。

「等等先......你意思係......你冇抽過Yes!卡?」我想她一定只是忘了吧?

「冇!以前小學一放學就要返屋企做功課,我爸媽唔畀我玩呢啲......」她淺笑了一下。

「吓?咁你細個有咩玩?」

「冇,返屋企如果五點之前做完功課,可以睇一陣卡通,六點半新聞開始就要溫習。」

我聽得目瞪口呆,道:「咁你真係......冇咩童年架喎!」

「唔......我自己都鍾意讀書,我好enjoy考試嗰種感覺。」她一臉倔強地說。

「嗯......」我一時間也不知如何回答是好。

她皺了一下眉:「不過諗返,又好似失去咗一啲嘢咁......」

我遞了一個一元硬幣給她:「不如你試下扭張Yes!卡吖。」

她卻沒有接過來,而是說:「咁大個人重玩呢啲,一陣畀其他人見到就慘。」

「邊個得閒理你?」我禁不住問。

眼前這個一向是女魔頭的女強人,竟然沒有反駁我,而是默言不語,好像在思考著甚麼。

我由衷地說:「放鬆啲,點解要迫自己迫得咁緊?」

「吓?」她一臉茫然地看著我。

「Alexendra,你成日要自己做最叻嗰個,你唔攰咩?」看著她的臉龐,我的心不知怎的有點隱隱作痛。

她垂下了眼簾,良久沒有說話;過了一會,她突然慢慢伸出手握住了我的手,她的手很柔軟,但又有點冰冷,我的心不由自主「噗咚噗咚」地猛跳著,我們這樣也算是牽手吧?!