意外愛上你


23. 那麼遠

日期:2017-08-23

我灰心地走到英皇道,向著地鐵站走去,就在往太古坊的樓梯前,我見到Alexendra正踏著樓梯進入太古坊。

我立即跟著走上去,卻見到她身邊原來有另一個人,就是上次跟她在coffee shop聊天的女人。

她們走進了上次的coffee shop,我在遠處猶豫了一下,決定像上次那樣坐在後面那張檯,點了杯咖啡偷聽著。

「叻女,都話你温柔啲,隨和啲,啲男人就冇戒心架啦。」那女人說。

「多得你教我,唔係我都搞唔掂。」Alexendra說。

「而家放下心頭大石啦!」

「係呀!」Alexendra笑著說。

她們在說我嗎?甚麼放下心頭大石?

那女人喝了一口咖啡,問道:「咁而家你同佢嘅相處點呀?」

Alexendra靜了一會,才開口回答:「冇!咪好似以前咁。」

「喂,你覺得佢會唔會對你動心?」那女人問。

「唔會,尋晚佢飲醉酒,係咁叫住以前女朋友個名,佢重……重攬埋我度。」

「嘩!咁狼!」女人驚訝地說。

「佢都唔係有心,不過最衰一開頭呃唔到佢擺個手機去我手袋……佢又會無啦啦唔用背囊,改咗用公事包,如果唔係,都唔使搞到咁。」

「你特登灌佢飲酒架?」女人又問。

「梗唔係,我真係忙住同啲客social,邊得閒理佢,估唔到錯有錯著,佢自己傻下傻下飲醉咗,喺的士度我先落到手。」

甚麼?她們的對話讓我愈聽愈疑惑,Alexendra對我做了甚麼?

「不過都好啦,雖然畀佢攬咗下,但總算任務成功delete 咗張相!恭喜晒!」女人歡欣地說。

「Delete咗張相」?我聽得目瞪口呆,連忙拿出手機打開相簿,果然,在賣物會中拍下的Alexendra照片已沒有了。原來Alexendra不是喜歡我,她做的一切就是為了令我放下戒心,以便拿我的手機把照片刪除!

我感到憤怒、傷心、後悔……這女魔頭從來都沒有改變過,她做任何事都有目的的,我甚至懷疑,她當日在賣物會對著小朋友所流露的温柔一面,也許也是別有用心!這個女人根本不會真誠待人!

我霍地站起來,卻不小心打翻了咖啡杯,忙亂間Alexendra望了過來,驚訝地叫著:「Fred?」

我狠狠地瞪了她一眼,便轉身離去,她在後面叫了我幾聲,我都沒有理會。這個女魔頭,我一定會給她好看。

回到家裡,拉根都在,他們殷切地問我情況:「點呀?追唔追到Alexendra?」

「追唔到呀,落到街都揾唔到佢。」我說。

「堅唔堅呀?咁你又咁夜返?」

「唓!追唔到咪自己周圍行下,散下心先返。」我當下沒有決定好要怎辦,為免節外生枝,所以沒有把實情說出。

拉根似乎十分失望,我卻立即回到房間,著手研究如何回復手機被刪除的檔案。我打開手機,竟發現令我高興的事,原來Alexendra只刪除了照片,卻沒有刪除短片,她似乎不知我偷拍了短片!這下子好了,她的詭計沒有得逞!

我打開Alexendra的WhatsApp,把短片傳了過去,然後關掉了電話,我要她今晚徹夜失眠!