意外愛上你


18. Alexendra的心意?

日期:2017-08-18

「點呀你?」那女人點了飲品,便關心地問Alexendra。

「佢今日著得同平時唔同,咁我咪聽你教讚下佢......」Alexendra說。

咦?我想起早上Alexendra的確讚過我的衣著,難道她口中的「佢」就是我?

「啱吖。」女人說。

「但佢只係『哦』一聲應我......」Alexendra好像十分苦惱。

她好像真是在說我,她......她為甚麼要聽這女人教導去讚我?

「可能佢嚇親啫,識你咁耐都知你做嘢好認真,有時難免唔好聲氣,佢係你下屬都受你唔少啦,你突然讚佢,佢唔驚就奇啦!」女人微笑著。

Lyle也聽到這句說話,他小聲地問我:「佢哋係唔係講緊你,佢下屬喎!著得同平時唔同喎!」

「殊!」我示意他不是作聲,以免被Alexendra聽見。

「咁我可以點?」Alexendra拿著小匙在攪動著杯中的咖啡。

「唔好咁快放棄,你要試多啲,對佢好啲。」女人頓了一頓,繼續道:「做女人一定要有女人嘅溫柔,先可以令男人心軟架!」

「點溫柔?我鬼識!」Alexendra粗聲粗氣地說。

「首先,講嘢聲量唔好咁大,盡量收細;另外,要有尾音,『點溫柔呀?我唔識呀』!」女人嫵媚地示範著。

「點溫柔呀?我唔識呀!」Alexendra試著學她的語氣,但聽起來就好像被人扼著喉嚨一樣,Lyle不禁在我身邊偷笑起來,可是,我卻笑不出,Alexendra似乎在為了我改變自己?我覺得這件事太詭異了!

就這樣,那女人都在教Alexendra各種嫵媚的語氣和關心的語調,而Alexendra很努力地學著;從她們少量其他的對話中,可以猜到她們大概是大學同學之類的。

大約也過了一小時,那女人說:「我都要返屋企陪老公啦!你要加油呀!」

Alexendra點了點頭:「咁我都返屋企!有諗唔通再WhatsApp你。」

她們離開了後,Lyle非常衰相的看著我:「你死啦!渣姐睇嚟鍾意咗你!」

雖然不願認同Lyle的說話,但聽完Alexendra和那女人的對話,我也難以否定這說法,我實在啞口無言。

「哈哈!唔使面都青晒下嘛?」Lyle大笑了起來。

「我......佢......」

「阿廢兄,即係呢,我就閱人無數嘅,我覺得你就......」他哄近我緊盯著我。

「我咩呀?」

「你應該對渣姐都有一份特殊嘅情感嘅!」

「大佬!佢成日鬧我架!鬧咗幾年!就算係有特殊嘅情感,都係驚恐囉!」

「但係......鬧咗你幾年,你驚足幾年,你又唔辭職?」他狡猾地笑著。

「我......我......」

「唔好諗即刻答!佢今朝係唔係讚你今日打扮得好睇?答!」突然提高聲線。

「係......」

「你個心係唔係開心?答!立即答!」

「有少少......但係......」

「唔使再講,所有嘢我都清楚晒啦!」他打斷了我的話,說著把手放在臉上,做了神探伽俐略的經典動作。

回到大興邨,他去了根叔那邊,我便自己先回家;我攤在床上,想著Alexendra在Coffee Shop的說話,不禁輾轉反側;我又想起早上的夢境,難道在我心裡,的確對Alexendra有特殊的情感?

模糊間,我沉沉地睡去,夢中好像又見到Alexendra,但當我早上又被拉根教練的哨子聲吵醒時,那個夢境的內容已被我忘掉了。

「今日冇靚衫著!但係唔緊要,尋晚我同根教練討論過,由於而家形勢有變,目標人物都對你有意思,我哋可以唔使去到咁盡!係唔係呀?根!」

「嗶」!「冇錯呀!拉!」根叔吹著哨子道。

我不太明白他們的意思,反正我知道可以穿回自己的衣服,也就夠了。

「今日,阿叻妹會發現你又變返平時個毒樣,佢一定會有啲嘢講嘅,你要表現得好自我,串串哋咁,試下佢有咩反應!呢啲女人可能係需要霸氣嘅男人!」根叔說。

「哦......」我睡眼惺忪地回應道。