【甜到漏、毒到癲】意外愛上你


16. 變身

日期:2017-08-16

「咯咯」有人在敲門,阿拉跑去把門一開,竟然是Alexendra!

她含羞地說:「我......我揾阿Fred。」

我望著她呆了半响,問:「點解你知我住喺度嘅?」

她紅著臉道:「我......我用我個管理層帳戶上公司個内聯網睇嘅。」

這時,Lyle打開鐵閘,把Alexendra 請了進屋:「入嚟坐先傾啦!呀......阿根叔,我頭先咪叫我去你嗰邊坐下嘅?」

根叔意會地笑了笑:「係係係!我哋即刻過去。」說罷他就邁步離去,Lyle趕緊跟在他身後,他離開時還很好手尾地關上門,和拉上鐵閘。

此刻,屋內只有我和Alexendra二人,我問她:「你揾我......咩事?」

她默不作聲哄上前,我不自覺後退了一步,但她又繼續上前,愈哄愈近,我感到她身體發出的熱力,還清楚聽到她急促的呼吸。

我輕聲地問:「你......做咩?」

她沒有回答,咬了一下下唇,然後親上了我的嘴......

她的嘴唇很軟、很厚,被她親吻著非常舒服......

「嗶」!

「嘩」!我整個人彈了起來,原來剛才的一切只是一場夢,而房門外傳來了非常刺耳的哨子聲。

我立即打開房門,Lyle就在門外,而出奇地,這麼一個星期一的早上,根叔也在我家,他們兩個都吹著哨子。

「你兩條友搞乜呀?」我煩躁地問。

「嗶」!Lyle又吹了一下哨子,續道:「今日起,叫我哋拉筋教練!」

我一時想不起甚麼拉筋教練,問:「乜料呀!晨早流流搞咩?」

根叔笑咪咪地說:「太好啦!今日係星期一,阿廢你又可以見到阿叻妹啦!」

他們......他們不是真的打算教我追求Alexendra吧?

「根!你放心!我會睇住佢!」Lyle對根叔做了一個敬禮的動作,而根叔也立即敬禮,並說:「拉,交畀你啦!」

說罷,Lyle把我拉出房間,先去洗手間對著鏡子,用髮型啫喱幫我整理出一個衝天的髮型,接著塞了一件恤衫和直腳褲給我,權威地說:「尋日星期日我同根叔特登去幫你買衫,你,立即換咗佢!」

怪不得昨天一整日不見了人,我把頭髮拉下來按平,說:「你哋都痴架!我唔會轉look架!」說罷我去衣櫃拿出我的連帽衛衣和多袋卡其色褲子準備換上。

根叔卻走過來,嚴肅地說:「阿廢仔,就算你唔係想追阿叻妹,都要改變一下。」

「點解?」

根叔哄過來,眼神銳利地說:「因為......你本來啲衫......真係......好.......毒!」

「哇哈哈哈哈哈哈哈哈哈哈....」拉根二人又狂笑起來。

「喂......你哋有咩資格話我先?你哋自己都著得好求其啦!」

Lyle托著下巴:「即係咁,我係一個浪子,我係唔會媾女嘅!」

「而我,我已結咗婚,係媾女成功個案!」根叔自豪地說。

我看一看Lyle手上的一套衣服,其實穿成這樣應也蠻好看的,只是未必及得上衛衣舒適而已,也許轉轉造型也不錯?

轉念一想,我沒有反駁,而是默默地把衣服換上,Lyle又幫我把頭髮弄好,之後塞了一個有點文青感的皮製公事包過來,說:「你個毒撚背囊入面啲嘢我倒晒入去啦!」

「What?毒撚背囊?」我大叫著。

「嗶」!根叔大力吹了一下哨子:「咪講咁多,出門口!go go go!」

我是要追Alexendra嗎?我雖然口裡說不,但心裡卻有點......

就這樣擾攘著,我們竟錯過了早上的村巴!回到公司時已九點半,我懾手懾腳地回到自己的座位,Lyle卻是大搖大擺地走著,他輕聲地說:「渣姐今日一定唔會鬧你,信我!」

話才說完,就聽見Alexendra在房中大叫出來:「廢拉!入嚟!」