【甜到漏、毒到癲】意外愛上你


14. Dark Age

日期:2017-08-14

「噗」!Lyle把口中的牛肉噴了出來,然後在梳化上狂笑起來!

「哇!拉奥你咩事呀?發神經咩!」根叔說。

「根......根......根叔,呼呼......你......你知唔知佢叫咩名?」Lyle笑得上氣不接下氣地指著我。

「又好似真係唔知喎!」根叔疑惑地說。

「佢......佢......唔......唔......」Lyle甫開口,我即撲上前按著他的嘴巴。

「喂!咩事呀?你想焗死佢咩?」根叔上前出力拉開我的手,就在這一瞬間,Lyle大叫:「佢叫阿Fred!阿廢!」

根叔顯得難以置信,大聲問著:「你係阿廢?你係阿廢?」

我感到地球空氣温度回升,有如直衝100度,我體内的血液則直衝頭髏,整個頭發滾著,沒法回答出任何話,根叔大概從我的表情已知道答案,瞬間跟Lyle一樣狂笑了起來。

「哇哈哈哈哈哈......」面前這兩個人按著肚子大聲笑著,而我腦海中竟然出現了兩個字:「滅口。」

不,我當然沒有真的殺了他們,我可是個良好市民;我帶著尷尬和憤怒,一聲不響地走入房間,關上門,懊惱地攤在床上戴上耳筒,意圖用音樂蓋過房外的笑聲。

可是不知怎的,愈聽音樂竟愈煩躁,我脫下耳筒,聽到Lyle仍和根叔狂笑著,而從他們對話中,我知道他們正在根叔的手機上回味著我和根叔--即Kinki的對話。

我用被蓋著自己,下意識地拿出手機亂按著,而不知怎的,我竟看了早上偷拍Alexendra的那個短片;我心想:「Kinki是根叔,那就沒可能是Alexendra了!」噢,Kinki不是Alexendra...

「咯咯......」Lyle在敲著我的房門並大叫著:「喂,出嚟啦!咪咁小氣!我都向根叔認咗開頭我有份同佢傾架!」

而根叔的聲音也響起:「阿廢哥,係我唔啱,我錯!你開門,我向你賠不是啦!」

我繼續看Alexendra的短片,懶得理睬他們,但心裡不禁問:「神呀!為何你要這樣對待一個善良的毒L呢?」

這時,Lyle見我沒有反應,又在門外大叫:「喂!你唔係做傻事下嘛?唔好呀!我踢門入嚟架啦!」

我無可奈何地放下手機掀起被子,起來去把房門打開,Lyle隨即一個閃身進了我的房間,以免我又關起門。

我板著面孔,而他倆的臉容很明顯就是在竭力地忍笑!

我冷淡地說:「根叔,你一把年紀都唔化嘅!玩埋啲咁無聊嘅嘢!」

「係係係!都係我唔好!我錯啦!呀......好彩阿廢你唔係厹,你真係正人君子!」根叔必恭必敬地說。

「當然!」我深表認同。

根叔又道:「係囉!好彩你唔係嗰啲無啦啦影自己子孫根放上網畀女仔睇啲人,唔係就......哈哈哈哈!」說著他又狂笑起來。

我狠狠地瞪了他一眼,正要開口罵他時,Lyle卻在背後疑惑地說:「呢個係......渣姐?」

萬籟又再沉寂,空氣再次變冷,我僵硬著身體轉向後一看,Lyle正從我的床上拿起我的手機,畫面正是Alexendra那短片。

「呢度咩地方嚟?」他迷惑地問,然後像是恍然大悟地叫起來:「哦!你偷拍渣姐,重喺床上一路睇一路......」

「喂,唔係你諗咁架!--」我大叫起來。

今天真是我dark age......