【甜到漏、毒到癲】意外愛上你


13. Kiniki的身份

日期:2017-08-13

我慢慢走進Alexendra教做手工的課室,躲在幾個家長身後,偷偷地拍攝眼前這個女人。

她已收起了剛才憤怒的情緒,專心一意地教小朋友,她的手靈巧地控制著繩子,指尖一捏一按,造出了一條栩栩如生的金魚;她的眼神是那麼專注,也帶著溫柔,我把這個情景都拍下來,心想這下子好了,如果他日Alexendra無理解僱我,我就把照片和短片都公諸於世!

我袋好手機離開課室,Alexendra完全沒有發意我的惡行,回到家中,Lyle還未起床,我攤坐在梳化上,轉念一想,如果Kinki是Alexendra,她現在應沒有空回覆我的Facebook訊息的,而且以剛才Alexendra這麼怨恨我的眼神,她也應不會回覆我。

於是,我打開Facebook發送了一句「Hello」給Kinki。

我凝望著屏幕,心裡祈求她會回覆我,可是等了半小時也沒有,我不禁急了起來,難道她真的是Alexendra?Alexendra為何扮作Kinki跟我聊天?莫非這個女魔頭一直都看愛我的小說,她......她該不會其實是暗地裡在偷偷仰慕我的才華吧?大家必須明白,雖然我曾有一個女朋友,但本質上我也是一個毒L,一個喜歡FF的毒L,這點我很清楚,但我總沒有可能飢不擇食地把Alexendra這個中女作為FF對像吧?然而,我此刻我的心裡,卻竟然有一點......暗喜。

「呵欠。」Lyle步出他的房間,很明顯他現在才起床,而現在已是中午了。

「喂,咁早起身嘅?一早同你個Kinki傾偈呀?」他見我坐在梳化抱著電腦。

我反了反眼道:「傾鬼傾馬咩?」我頓了一下,問他:「喂,問你一個問題。」

「咩事?」

「你同Kinki傾過偈,你覺得佢似唔似一個人?」

「咁佢梗係人嚟啦!唔好嚇我呀廢哥!」

「唔係呀!我意思係......佢似唔似Alexendra?」

Lyle呆了一下,然後大笑起來:「你係唔係搞gag?Kinki好明顯係啲亂上網識人嘅MK妹!」

「唔係呢!你睇下!」說罷我把在Kinki和Alexendra的Facebook都出現的天使卡通公仔給他看。

「就算都有呢張相,都係巧合嘅啫!而家啲女人鍾意咩公仔,我哋鬼識咩!」

「都係嘅......」

「咪住先!你......」他狡猾地看著我,道:「你......你個樣咁失望嘅?」

我失望嗎?我立即反抗:「咩呀!嗱......唔好亂講嘢呀!」

「嗱......」這時有人敲了敲我們的大門,Lyle便過去開門,原來是鄰居根叔。

「哈佬!我又煮咗好多好嘢食呀!一齊食啦!」根叔捧著三盒香噴噴的食物進來。

「哇!正呀!根叔!」Lyle見到美食在眼前,似乎已把我倆剛才的對話拋諸腦後,我不禁鬆一口氣。

這也難怪Lyle,我看著眼前的豉油王炒麵、清燉牛肉、金銀蛋時菜,也都食指大動。

「係呢,根叔,你成日得閒整咁多嘢食嘅?」我問。

「冇法子啦,老婆死得早,我又好早退咗休無所事事,本身親戚介紹走去港島嗰邊做保安,點知個親戚之後都唔撈,我咪無端端又冇得撈囉!不過唔緊要啦,搬返嚟屯門,樂得清閒,得閒發下白日夢『尖明』一下,有時又煮下新菜式,又或者搞下啲雞毛鴨蒜嘅嘢又一日囉!」

「咁咪幾好!我哋都想咁呀!日日返工對住電腦眼都盲!」Lyle說。

「不過又咁喎!我都好潮架,我有學上網,又上高登又上Facebook咁!」根叔說。

「哇!上高登!咁你又真係威喎!」我吃著美味的牛肉,自然要「賣口乖」。

「我最近上高登,見到啲嘢好好玩!」根叔說。

「咩呀?」我和Lyle異口同聲地問。

「個遊戲叫......釣厹!」根叔得意地說。

「吓?即係咩?」Lyle問。

「即係扮女仔上網呃啲男人,有啲男人見到女仔就會露出狼相!」根叔說罷從褲袋拿出手機:「不過我而家釣緊嗰個都暫時都唔係好厹嘅,但我諗再引多佢幾下都可能上釣架啦!」

根叔按著手機,說:「嗱!個麻甩佬頭先又自動搵我啦,頭先煮緊嘢都唔得閒覆。」他旋即把手機遞過來給我們看,那個畫面完全震撼了十三億人,我甚至覺得全球空氣突然變冷,萬物停止生長......因為畫面上的一句「Hello」正是由我發出的......