【甜到漏、毒到癲】意外愛上你


7. Kinki To

日期:2017-08-07

這單位的門是沒有防盜眼的,我把門打開,門外站了一個五十多歲的男人。

「呀,拉奧呢?」他問。

「咩拉奥?」

「你邊個嚟架?」我揾拉奥。」

「哦!Lyle!佢沖緊涼。」我心想,這個男人可能不懂英語,所以叫Lyle作 拉奥。

「我住對面嘅,我係根叔,想問你哋借啲豉油。」

「吓!夜媽媽借豉油?」

「喂!根叔!」這時Lyle剛洗完澡出來。

「拉奥,我借豉油呀!」

「又整嘢食呀?」Lyle邊說邊轉身去廚房拿豉油。

「係呀!唔該晒!」根叔接過豉油就離去了。

我把大門關上,問Lyle:「乜人嚟架,夜媽媽整嘢食?」

「根叔住咗好多年架啦,份人係蠢少少咁,但就冇時停;之前有一排佢keep住呢度個戶籍但又搬咗去港島嗰邊住,都近你架,就西灣河嗰邊,做咩住宅保安過日辰喎;之後聽佢講,話唔知衰乜畀人炒咗,失業咪搬返返嚟囉!跟住佢而家又話要練習煮嘢食喎,有時佢會拎啲嘢食過嚟益我架!」

「哦哦,有嘢食又幾好喎。」我邊隨便回應著,邊回到梳化上繼續營運我的facebook專頁。

「話時話,阿廢,你冇拍拖咩?都好少聽你話要去街嘅?」

「唔好叫我做阿廢,叫我阿Fred。」我反了一下眼。

「Okok, take 2,Fred哥你冇拍拖?」

「分咗手啦!唔好提。」不知Mable在另一個世界生活得可好?

「唉......多情自古空餘恨,Fred哥冇女毒到震!」Lyle竟得意地說。

我沒理會他,打開電腦看看「dayday8」的讀者們有沒有新留言,「噹」突然,我的facebook專頁收到一個來自「Kinki To」的訊息:「Hello 阿廢,你寫啲故好好睇呀!」

「多謝支持!」每次收到讀者的訊息也好,like也好,留言也好,都會覺得特別高興。

「我可唔可以成日同你傾偈呀?」

雖然好像哪裡怪怪,但既然是讀者要求,我也是高興的,所以我還是一口答應:「可以。」心裡卻想不出甚麼聊天的話題。

「你平時鍾意做啲咩架?」想不到她主動帶起話題。

「上網識下女仔咁囉!」別誤會!這不是我的回覆,而是我耳邊聽到的聲音,原來Lyle正托著頭在我旁邊,眼看著我的電腦屏幕。

「喂,你知唔知咩叫私隱架?」我立即把電腦合上。

「讀書時冇教喎!」

我反了下眼沒有回應。

「喂!原來你咁柒都喺網上有fans架?個女仔張相重幾靚,快啲同人傾下偈啦!」

「妖,三唔識七唔知傾乜。」

「唉,同女仔傾偈,真係要請教下我!」

「如果你咁醒,就唔會今時今日都孤家寡人啦!」

「我,係一個浪子,冇女人可以縛得住我!但要溝女,一定要請教我。」

「收皮啦!早抖!」說罷我立即站起,回到房中睡覺去,我當時卻沒有想到,在我睡覺後,Lyle竟然......

第二天早上,我走出房間,見到Lyle竟然在梳化上睡了,老實說,他的睡相真的有夠衰,一臉口水,而且還一手搲著肚腩,但這些都不是重點,重點是他另一隻手正抱著我的Macbook!原來我昨晚回房睡時沒有拿回電腦!

我立即撲上去搶回Macbook,打開一看,「呀!--」我怒吼了出來!他竟然代我跟昨晚那個Kinki聊天!

我沉著氣看看他們聊過甚麼......