【甜到漏、毒到癲】意外愛上你


5. 大興邨

日期:2017-08-05

「唔係真係鬼屋下哇?你咁跣我?」我也壓低了聲線說。

「你都低低地,係黑市公屋呀!」Lyle也輕聲道。

「吓,有冇事架?」

「我租左十幾年,咩事都冇!一係你星期六過嚟睇睇。」

「唉,好啦......」

到了星期六,我在家中出發,花了近兩小時才來到屯門大興邨,就是Lyle住的地方。巴士一到總站,就見到他在等我。

「阿Lyle,真係好遠喎!你每日幾點出門口返工架?」

「都話返工可以坐村巴咯,一上車就瞓,一個鐘左右就到架啦!」

巴士總站就在大興邨内,大興邨給我的印象是「空曠」,街道不像港島區那麼擠迫,而且空氣也很好;我跟著他過馬路,經過一個舊式屋村的商場,大約五分鐘左右就來到興耀樓。

大廈不像是我家那種和諧式公屋,而是十字型,下闊上窄有如梯形的設計,即愈低層的單位愈大,愈高則愈小;我們乘電梯抵達十一樓,每層的中央是兩部電梯,四邊各有一條巷仔,每條巷有十二戶人。

Lyle住在面對電梯的巷仔盡頭,老實說,$2500月租我實在沒有甚麼期望,只是即管來看看;Lyle拉開鐵閘,把門打開,這單位真令我眼前一亮!

這個單位廚房和廁所都在類似騎樓的地方,窗戶不是鋁窗,是打横的鐵枝,沒有玻璃的;騎樓和屋之間以百頁玻璃窗相隔,倒是很有舊屋村的風味。

而令我驚喜的,是屋內設計簡約得來帶點品味,淺灰色的地板,配上白色牆身,傢俬都以白色為主,屋內有兩個板間房間,一個是睡房,一個是書房,客廳則有一張淺灰色的小梳化和電視,因為空間太少,這單位是沒有飯廳的。

「哇!Lyle,你個戶主啲裝修都幾有品味!竟然重有書房!」

「咩戶主裝修呀?我得戶主同意之下整架,地板就佢本身有嘅,不過間房呀、傢俬呀......呢啲就我一手一腳搞嘅,我喺度租咗十幾年架啦,戶主應都唔會趕我走,你知啦,始終都係黑市嘅......」

我心想,Lyle平日上班總是穿得十分隨便,想不到家居品味卻還是有的。老實說,這單位給我的感覺比那東大街的劏房好多了,而且租金也是十分吸引。

「咁......如果我同你分租。我瞓邊呀?」他不會要我跟他孖鋪吧?

「嗱!書房都好大,夠你擺張床擺個櫃仔,至多我搬返張書枱出廳用囉,廳呀、廚房呀、廁所嗰啲就共用啦!」

「咁呀......好啦!不過我可唔可以唔簽一年租,簽住半年先?我怕我住唔慣屯門。」

「都好啦,有人幫我交半年租......呀唔係,交半年嘅一半租先啱!好過冇啦!」

就這樣,我去姨媽傢俬買了最便宜的床架和一個簡單的衣櫃,便搬進了大興邨,跟Lyle一起住。想不到,卻因此有了人生中的一段奇遇,也不知是好是壞地,間接助我有了新的......戀情。