由駛上屯門公路的一刻開始,我們都回不去了


12. 怪異

日期:2017-05-19

「Moving?」Pure又叫了叫他,但他仍是沒有反應。

不知為何我有一重不祥的感覺,覺得Pure可能會有危險,我立即從龍尾走到前方去,想看看發生甚麼事。

我稍微拉開了Pure,  然後極大聲地叫:「Moving?」

他這才慢慢轉身,一臉緊張地看著我。

「冇嘢吖嘛?你……咩事?」我疑惑地問。

「嗯,頭先Pure係唔係話要去食嘢?」他問,臉上的緊張神情卻沒有放鬆下來,我知道一定有甚麼事情發生了。

「係呀!佢哋好餓。」Pure答。

「咁快啲跟我入商場搵嘢食啦!」說罷他急步轉身向左人龍左面的商場入口走去。

他的步伐十分急速,急速得令我非常疑惑,即使是因為電筒男他們肚子餓,也沒必要走得這麼急吧?

人龍跟著他進了商場,他皺著眉回頭說:「大家喺度等下先,Moving哥哥去睇下有咩好嘢食。」

小真開心地大叫:「好嘢!」

Moving微笑了一下便立即轉身,快步向前走去。

我覺得他的行徑著實不尋常,是以便急急對Pure說:「你睇住小真、花花佢哋,我都去睇下!」

Pure點了點頭,我便快步向Moving走的方向追上去,只見他在不遠處左右張望的急步走著,似乎是在尋找甚麼,難道他真的是在找餐廳?可是商場的這一層似乎並不大,放眼看去都是凶宅、百老妹等電器店,餐廳又怎會在這一層呢?

不知他是不是察覺到我跟著他,他突然跑了起來!這時我可以完全斷定:「呢個人相當有嫌疑!」

幸好我也跑得不慢,我追著他往左面走去,在我迫近他時,只見他想推開一扇門走進去,我立即伸手抓住了他的肩膀,大喝一聲:「你去邊?」

他慌張地回頭道:「我去邊?」

「你根本唔係去搵餐廳,你到底去邊?你係唔係搵人捉我哋?」

「痴線,我搵咩人捉你呀?你而家唔好捉住我先真呀!」Moving大力甩開了我,繼續向前想推門走去。

「喂!」我又想伸手拉著他,他卻頭也不回地大叫:「急爛屎呀屌!屙完先同你講!」

這時我才發現前面便是男廁……原來他只是肚痛而已。

等了十分鐘左右,他搓著肚子一臉滿足地從男廁出來,我連忙不滿地走上前道:「屙屎就早響啦!個樣好似好可疑咁,以為你有咩陰謀呀!」

「你個樣直頭便秘咁呀!我唔想同Pure講我急屎吖嘛!」

「你男人老狗唔係怕羞下嘛?追住你追到我扯晒蝦!」

「跑幾步就扯蝦你根本腎虧!」

我和Moving就這樣你一言我一語地吵吵鬧鬧回到去找Pure他們,只見花花等人正在百老妹電器店內追逐,Pure則站在外面看著他們。

「乜你哋突然咁好傾嘅?」Pure甫見我跟Moving回來便問。

Moving大力地搭著我的肩膀:「係呀!我哋原來好好傾!」

「屌!你有冇洗手架!」我瞪著他輕聲說。

「係呢,佢哋喺人哋舖頭跑去,唔驚畀人鬧咩?一陣撞跌人哋啲嘢就弊。」Moving看著花花她們說。

「我都驚,但我捉唔晒咁多個,而且,奇就奇在呢度啲舖頭冇人,連店員都冇,乜屯門區購物興咁自助嘅咩?」

「冇人?」我奇怪地一邊說一邊張望四周,的而且確,這個商場雖然燈火通明,但卻像是只有我們一樣。

「講笑咩,點會冇人呀?」Moving雖然這麼說,但從他的眼神中,也可看出他內心的疑惑。