尋日去炒散搬貨,我執咗隻黑貓返屋企


30. 完

日期:2017-04-21

唔通眼前嘅火仔同阿水都係妖獸扮嘅?

我、阿慧、金城有同阿童木起晒鋼咁望住眼前嘅火仔同阿水,表面上佢哋同平時冇咩分別。

呢個時候,阿水話:「大家唔好咁緊張,我救大王係因為……我喺佢嘅眼神入面睇唔到佢有任何惡意。」

火仔都話:「我同意,我做廟祝而且由細到大喺廟長大,我感覺到大王身上雖然有妖起,但亦有一種善良嘅氣息。」

「善良嘅氣息?」我唔知佢講乜春。

「噗!」畀鎖鍊捉住嘅大王突然跪咗喺地下,係咁喊。

「喂,又未殺你,你喊乜?」阿童木有啲唔耐煩。

「我係妖,但我真係好想過平凡人嘅生活呀!我好享受喺電視台做主持,重可以日日同我最愛嘅李錦全鬥嘴,真係好幸福!」大王喊到勁大聲咁話。

「最愛嘅……李錦全?」除咗阿童木之外,其他人都忍唔住大叫咗出嚟。

只見阿童木塊面青晒,結結巴巴咁話:「你……你係妖獸,做乜扮人?」

「我好厭倦喺黑暗帝國嘅生活啦,每一日都畀上頭派出去戰爭,好彩就打贏保住條命,唔好彩就畀人打死,就算走得甩,輸咗返去都係會受罰。」佢喊到眼淚鼻涕都撈埋一齊,搞到比平時更樣衰十倍:「我都唔明,就算毀滅咗月亮王國又點,又唔係有著數,又唔係拎撻地用,純粹好似打完飛機咁爽一嘢,有咩用?」

「唔怪得你身上嘅妖氣咁淡啦。」露娜話。

「你……你有份毀滅月亮王國,重比喻為打飛機咁爽?」唔知點解我聽完好撚嬲衝上去抽住佢衫領:「講埋啲咁嘅嘢,你知唔知我係邊個?」

「你?我真係唔知喎。」

「公主呀,佢以前都係做細嘅,未必真係有同我哋打過,就算有,我哋轉世後變晒樣,又點會認得我哋?而且我睇佢個款,都係匿埋一二邊睇人打嘅冇膽匪類嚟,月亮王國嘅事唔算係佢錯啦。」阿水話。

「係呀!你真係了解我!匿埋保命好緊要!」大王好感激咁望住阿水。

聽見阿水咁講,諗深一層都係嘅,大王做細嘅都係聽指示做嘅啫;我慢慢放開大王,然後佢望住我,突然問:「咪住先,頭先我救命恩人叫你做公主?」

我撥一撥頭髮:「冇錯,我就係月亮公主。」

「你係公主?」佢好驚訝:「你毀咗容呀?」

「屌!」我又忍唔住抽住佢條領。

「對唔住呀!公主,我唔會再亂講嘢,我只係希望黑暗帝國嘅人都揾我唔到,等我可以做個平凡人。」

「你白痴嘅咩?日日上電視,你估黑暗帝國嘅人唔睇電視嘅咩?」金城有問。

「我而家個樣係整容整出嚟,本身我成個劉華撈吳彥祖咁靚仔架!」大王話。

「嘩!咁你已經得到你嘅報應啦。」金城有講完就一嘢拉返條鎖鍊返嚟。

大王望下佢,又望下我,我點咗下點:「既然你唔會作惡,你走啦。」

大王開心到彈起身:「咁我走先啦,你哋記得睇我同honey……呀唔係,係阿童木個節目喎!」佢講完就急步咁走咗。

阿童木塊面好似紙咁白,成個身癱軟喺落地,喃喃自語:「唔係嘛?」

「唔係馬唔通係貓咩?」我搞咗個爛gag希望令大家心情放鬆,呀唔係,其實除咗阿童木外,其他人都好放鬆。

呢個時候,阿水行去阿童木旁邊拍一拍佢:「對唔住呀,頭先抵銷咗你個絕招。」

阿童木呆呆下望住阿水:「嗯,唔緊要。」

「啪啪啪!」金城有突然大力拍手:「大家提記精神!我哋終於齊腳,今後我哋一齊努力對付黑暗帝國嘅妖獸啦!」

「好!」我哋異口同聲咁話。

「喂喂。」我拍一拍金城有話:「下次可唔可以唔好搶我呢個主角嘅對白呢?」

「唔可以!」

 


--完--