尋日去炒散搬貨,我執咗隻黑貓返屋企


29. 大王

日期:2017-04-20

因為聽到露娜、棟你個篤話大王身上有妖氣,喺佢坐起身時,我哋即時好似摩西過紅海時啲海水咁散開兩邊。

「頭痛死,頭先咩事呢?」大王摸下個後尾枕,然後抬高頭望我哋。

「嘩!咩事?人妖show呀?」佢企起身,突然間發現露娜喺佢旁邊,佢即刻邊大叫邊彈咗埋牆:「嘩!呢隻貓何方神聖?竟然識講嘢?」

「我問你何方妖孽就真呀?」我大聲講,然後擺咗個靚姿勢:「我哋係愛與正義嘅金木水火土同月亮戰士,等我哋嚟收拾你!」

「喂,做乜代我哋講埋對白?」金城有睥咗我一下。

我冇理佢,繼續用凌厲眼神望住大王,點知佢詐傻扮懵話:「咩妖孽呀?你哋呢個樣先係妖孽呀?」

「重扮嘢?你身上有妖氣啦!」金城有話。

「有妖氣?」大王遞高手聞下自己個格肋底,然後話:「頂,你哋……畀你哋知我身份添!」

佢未講完就轉身想離開餐廳貴賓房,呢個時候金城有大叫:「愛神維納斯鎖鍊!」一條粗鎖鍊向大王飛過去,好快將佢縛住咗。

「超霸雷霆!」阿童木終於忍唔住第一次出招,搞到我哋明明喺室內,個天花版都好似行雷閃電咁,睇嚟阿童木因為同大王素有積怨,想一嘢劈鳩死佢。

阿童木將啲閃電凝聚喺手心,然後向住大王劈過去。

「唔好呀!」大王大叫,就喺佢差啲被劈中時,突然聽見阿水話:「皂泡紛飛!」

「嘩!閃電劈重唔夠,重要加藍泡泡?今鋪睇怕都唔使我出手。」我心諗。

點知阿水啲藍泡泡原來唔係攻擊大王,而係飄去圍住阿童木啲閃電。

「呀!」一時間,阿童木嘅閃電被藍泡泡抵銷咗。

「阿水?點解你要救佢?」金城有好疑惑咁望住阿水。

「唔通你同佢係一伙嘅?你……你係唔係真嘅阿水?」阿童木好質疑阿水。

「吓!唔係啩?」一時間,我都分唔清面前嘅阿水是敵是友,不過穩陣起見,我即時彈埋去金城有同阿童木身邊,等佢哋保護我……呀,唔係,係等我保護佢哋。

「火仔,快啲埋嚟啦!」我叫火仔都避一避,但係佢竟然冇照做,重慢慢行近阿水。