尋日去炒散搬貨,我執咗隻黑貓返屋企


28. 妖氣

日期:2017-04-19

「咩……咩……咩……」李錦全驚到口窒窒。

露娜望實佢,額頭嘅月亮射出一道光,直射去李錦全個額頭。

「咦?」棟你個篤喺暈咗嘅大王旁邊行嚟行去唔知做乜。

「嗚呀,我唔想見到佢裸體呀!」隨住阿慧尖叫,我用手遮住佢對眼,而李錦全就一如所料突然全身啲衫冇晒,隻腳伸到去個頭旁邊,再360 度瘋狂自轉之際,啲絲帶唔個喺邊飛出嚟繞住佢啲手腳,變成咗手套同埋靴,忽然佢條腰間又出現塊綠色布變成嘅裙……

「我……我……我……」李錦全呆咗咁望住自己一身嘅裝扮。

「木星戰士,我哋終於揾到你啦!」露娜話:「保護地球嘅任務就交畀你五個,當然重有禮服蒙面俠阿慧啦!」

阿慧聽見就話:「唉,我未去旺角買禮服,唔可以同你哋一直作戰住呀?」

金城有留意到李錦全個樣好疑惑,就問佢:「你記唔記得我哋,記唔記得自己前世係木星戰士?」

「我……我好似有少少印象自己著住呢套衫嘅樣,但係,你哋係邊個?」

「我係金星戰士,變身!」金城有變身著住水手服畀李錦全睇,希望喚醒佢哋嘅記憶。

「我哋都係戰士,變身!」阿水同火仔又跟住變。

「變身……」然後我都弱弱咁叫。

「我……我記得你哋啦!」李錦全望兩望之後興奮大叫:「原來我係木星戰士,唔怪得我個名有個木字啦,枉我重改咗個藝名,你哋一定揾得我好辛苦啦!」

「咁不如我哋以後叫返你阿童木啦!」火仔話。

「吓……咁好啦……」阿童木好似唔多願意,但係都應承咗。

呢個時候棟你個篤無啦啦跳去我哋中間話:「你哋感覺唔到咩?」

「感覺?感覺啲乜?」我問。

露娜突然跳咗落地行咗兩步,再抬頭望住我哋話:「係喎,大王身上有少少妖氣嘅?」

「妖氣?」阿水話。

「嗯,係好少量嘅妖氣;奇怪,如果佢係妖,身上冇理由得咁少妖氣,但如果佢係人,又唔可能有妖氣。」棟你個篤話。

「呀!個頭好痛呀!」呢個時候,大王突然醒咗慢慢咁坐起身。