尋日去炒散搬貨,我執咗隻黑貓返屋企


27. 見面

日期:2017-04-18

金城有果然有少少料到,真係約到李錦全去電視台附近一間餐廳嘅貴賓房同我哋咁多個見面。

我哋五個人加兩隻貓去到餐廳,李錦全已一個人坐咗喺度。

「城有大哥!」佢一見到金城有就好鬼興奮咁打招呼。

「你好!呢啲係我partner。 」金城有好有禮貌咁應佢同埋介紹我哋。

「Partner?你哋今次揾我係唔係有咩好路數?例如同你一齊拍電影之類?」李錦全一臉期待咁話。

「嗯……其實係咁嘅……」金城有一邊講一邊同我分別拉開背囊,想放露娜同棟你個篤出嚟,等佢哋望下李錦全係唔係木星戰士。

但係佢都未講完,突然有把好大嘅聲喺未閂嘅貴賓房門外傳嚟:「阿童木!」

我哋擰過去望,原來係成日同李錦全主持節目時互串嗰個大王。

只見大王托一托副粗框眼鏡走過嚟,個表情好浮誇好似好意外咁望一望金城有,然後大叫:「城有大哥!乜原來你都喺度?」

金城有面黑黑咁戴返副黑超,然後話:「係,我同李錦全有啲嘢傾。」

咁又難怪佢黑面,其實我哋其他戰士同埋阿慧都忍唔住黑面,因為大王突然出現,萬一李錦全真係木星戰士,我哋都唔方便令佢醒覺。

大王不請自來走入嚟坐咗喺李錦全旁邊,李錦全嬲嬲地咁話:「你唔好再叫我阿童木啦!」

大王嬉皮笑臉咁話:「怕咩唧?呢度都係熟人!」然後佢望住金城有話:「城有大哥呀,你都知啲觀眾幾鍾意睇我同阿童木……呀唔係,李錦全先啱;你都知啲人幾鍾意睇我哋兩個啲火花架啦,你揾佢拍嘢,又點可冇咗我呢?」

金城有冷冷咁話:「我哋今次真係唔需要你,或者需要時我再揾你啦,我今次只想同李錦全傾。」

「咦?」大王好似冇聽到金城有講乜,佢突然指住我半拉開嘅背囊話:「咦?有隻貓嘅?唔通今次個節目係叫李錦全煮貓?」

露娜聽到即刻跳出嚟企上枱,條尾同全身嘅毛都豎起晒,好嬲咁望住大王。

「唏,呢隻貓識聽人話架?」大王話。

露娜一步一步行向大王,然後竟然開口話:「唔只識聽,我重識講。」

「你……你……你……你識講嘢嘅?」大王嚇到講完呢句就暈咗,而李錦全就指住露娜,個口擘到好似張枱咁大。

「係你啦,木星戰士。」露娜好冷靜咁講,呢個時間,棟你個篤亦由金城有個背囊捐出嚟,一嘢跳咗上枱面。