尋日去炒散搬貨,我執咗隻黑貓返屋企


26. 木星戰士

日期:2017-04-14

雖然我同阿慧冇咀到,但我真係好開心,因為今次係我嘅……初戀呀!係初戀呀!

我帶阿慧去見阿水、金城有同火仔,當然重有露娜同棟你個篤。

「哇!金星戰士,原來你轉世變咗金城有!唔怪得我特別鍾意睇你做戲啦!」阿慧好興奮。

「嘖。」我一手拉返阿慧返嚟。

「恭喜你呀阿滿,終於揾返阿衛。」阿水話。

「係呢,你哋前世有冇情人架?不如我哋都去揾埋佢哋。」我問。

「夠啦,而家唔係做呢啲嘢嘅時候。」棟你個篤好嚴厲咁睥實我,我真係唔多鍾意呢隻白貓,個名已經夠衰,重同佢主人金城有一樣咁扮嘢。

「冇錯,而家我哋揾埋木星戰士就可以齊腳。」火仔話。

「大海茫茫,去邊揾吖?」我話。

「都唔係嘅,好似你哋咁講,個名有個木字,同埋煮嘢叻,我心目中有一個。」阿慧話。

「係邊個?」阿水問。

「你哋冇睇電視咩?」阿慧好得戚咁講,對眼圓碌碌好鬼可愛。

「電視?」金城有喃喃自語。

「係呀,電視台有個啦!」阿慧話。

「識煮嘢食、大力都唔少,不過真係諗唔起邊個會係木星戰士。」金城有話。

「係李錦全呀!」阿慧話。

我摸下阿慧個頭頂,話:「傻妹,個名要有個木字呀!而且佢都唔似大力。」

「你哋唔知咩?李錦全只係藝名,佢真名係何同木,我睇過啲八卦雜誌話佢唔想人哋叫佢阿童木,所以用藝名。至於大唔大力,真係試過先知。」阿慧話。

「阿慧!今次你真係幫咗我哋一個大忙!」露娜話。

「公主嘅事,咪即係我嘅事。 」阿慧臉紅咗下,個樣真係好靚,我望到呆撚咗。

火仔話:「咁重等乜?我哋去揾李錦全啦!」

金城有又懶巴閉咁話:「咳!不如等我安排下,問電視台啲朋友拎佢電話再約佢出嚟啦。」