尋日去炒散搬貨,我執咗隻黑貓返屋企


25. 係愛呀!

日期:2017-04-12

「咩唔使?阿慧!你流晒血啦!」我想再用手幫佢抹啲血,但係……咦?冇晒血嘅?

「係愛呀!係愛令我止咗血。」阿慧慢慢坐起身。

「你講乜話?愛?」我望住佢,佢而家個樣靚到「轟」一聲。

「係呀,公主。」佢淡淡然咁答我。

「你……你你你叫我咩話?」

「我記得啦,頭先我受傷嗰陣,你攬住我幫我抹血嘅情形,令我記得喺上一世,都經歷過呢個情形。」佢含情脈脈咁望住我。

「真嘅,你……你係地場衛?」

阿慧點咗下頭話:「係,唔同嘅係,上一世我死喺你懷中, 而今世你嘅愛令我止咗血冇晒事。」

「噢!我知啦!可能我頭先隻手有你啲血,唔小心整到落新月棒粒紅寶石度,你上一世嘅血感應到你今世嘅血,所以產生反應,整咗啲粉紅氣場出嚟救返你。」

「嗯。」阿慧伸手托住我塊面:「公主,我好掛住你,我哋……」

佢愈哄愈埋,啲少女氣息好似海嘯咁湧埋嚟,我哋嘅嘴唇而家只有一厘米嘅距離。

「嗚呀!」我個心喺度吶喊,「我未拍過拖架!」

「咪住先!」我截停咗佢。

「咩事呀,公主?」佢好疑惑咁問。

「你今世夠16歲未?」我問。

佢「噗」一聲笑咗:「我哋kiss咋!你想點?況且我17歲架啦!」

我唔好意思咁點下頭,佢又再次哄埋嚟。

「咪咪咪咪住!」我又大叫。

「又做乜?」

「你著住校服架,咁唔係幾好。」

「唉。」佢嘆咗口氣,然後又笑咗笑:「公主,你真係冇變過。」

我扶佢起身,一臉認真咁同佢講:「點都好,今世我唔會再畀你為我犧牲。」