尋日去炒散搬貨,我執咗隻黑貓返屋企


23. 姻緣

日期:2017-04-10

「你做咩打我?」我呆撚咗。

「你個死鹹蟲!」阿慧莫名其妙嬲爆擰轉身走。

「阿慧!」我唔可以錯過呢次機會,一邊追上前一邊喺褲袋拎咗新月棒出嚟。

「你睇下我碌嘢先啦!」我追到佢,用新月棒篤佢膊頭。

佢好嬲擰轉身大叫:「唔好掂我呀!」

我嚇到拎住碌新月棒高舉雙手,然後佢面紅紅咁望住我隻手:「你……你係叫我睇你手上枝……嘢?」

「係呀,你睇下!」我遞枝新月棒畀佢睇。

佢望咗望:「係……係咩嚟?係筆?」

「梗係唔係筆啦!你睇真啲。」

「唔會……唔會係嗰啲玩具啩?」佢唔知做咩個面紅晒。

「咩玩具?好緊要架呢碌嘢,阿水都有一枝。」

「水哥都有?」佢睇落好意外。

「係呀!我哋隨時都可能用。」

「你哋?隨時用?一齊用?」佢擘大對眼望住我。

「又唔係隨時用嘅,即係有需要時咪用。」我話。

「有……需……要……時?」佢逐個字講出嚟,好似好難以置信咁,唔通佢對枝棒有印象?

「係呀!你係唔係諗到啲咩?」我試問佢。

「我……我知啦!」佢好堅定咁點下頭:「你同阿水……我明嘅,嗯……你哋玩得開心啲啦。」佢突然又好似傻咗咁大笑:「水哥係唔係以為我暗戀佢,所以想揾你出嚟澄清你同阿水嘅關係?」

今次到我聽到一頭霧水:「我同阿水?關係?」

「得架啦,而家社會好開明,你唔使擔心,你哋係我救命恩人,我仍然會感激你哋。」佢話。

「唔係呀!我唔係要感激。」我唔係好聽得明佢講乜,只知佢話感激我,我好心急咁將新月棒有紅寶石嘅位置畀佢睇:「你睇下先啦!上面有紅寶石!」

「紅寶石?而家呢啲性玩具咁豪華嘅,嘻嘻,你同水哥真係識玩。」佢只係望咗粒紅寶石一眼,就自己喺度笑。

「性玩具?咩性玩具?你睇真啲!」我捉住佢隻手,塞碌嘢去佢手板。

「嘩!做乜呀?我唔想掂到枝棒呀!」佢係咁尖叫住推開,但混亂間佢突然停咗,呆望住手上枝新月棒。

「點呀?係唔係諗起啲咩?」

「我知啦,呢枝嘢咁新淨,似乎唔係你用開,唔通……你係推銷性玩具嘅?你想sell我?」

「吓?」佢嘅創作力量同幻想,真係會嚇我一跳。

「唉……算啦,冇嘢啦。」我想放棄,佢都認唔出新月棒,睇嚟都唔係我想揾嘅人。我一手搶返枝新月棒,轉身就走。