尋日去炒散搬貨,我執咗隻黑貓返屋企


22. 緣份

日期:2017-04-06

「公主,起身啦!」一個落住雨嘅早上,露娜又嘈醒咗我。

「又點呀?畀我抖抖得唔得?」我轉身面向牆唔想理佢。

「我哋差木星戰士咋,快啲揾埋佢出嚟啦!」

「差一個咁少,慢慢揾啦!而且你話架嘛,你同戰士之間有緣份牽引,點都會見得返,其實做乜咁辛苦去揾唧?」

「係就係有緣份牽引,但萬一等30年先遇見,到時你哋變晒阿伯,就真係想打都冇力打啦!」

「喂,咁如果我哋打幾十年都打唔贏,到時我哋老咗,揾咩人做戰士同嗰班怪物鬥?」

「呢個係一個好問題,所以你哋……你哋一定要生兒育女,等子女繼承你哋戰士嘅身份。」露娜話。

「生兒育女?」我興奮到坐咗起身:「咁快啲揾個老婆畀我啦!」

露娜翻咗個白眼:「一講呢啲你就咁興奮……」

「喂,嗰個阿慧呢,你話會唔會係我要揾嘅人吖嗱?」

「嗰日金城有都講啦,世上咁多叫阿慧嘅女仔,你估一定係佢咩?」

「咁但係,都唔可以完全排除佢就係地球王子轉世嘅機會呀!點先可以核實佢身份?」

「你想核實佢身份?」露娜諗咗陣:「前世阿衛變身成禮服蒙面俠,佢為咗保衛月亮王國同保護你,壯烈犧牲咗。喺佢死之前,佢嘅血意外滴咗落新月棒上……」

「喺?」我即刻拎碌新月棒出嚟睇:「唔通呢粒紅寶石,就係阿衛嘅血變成?」

「冇錯,所以我諗,如果對方真係阿衛轉世,佢睇到新月棒應該會有啲記憶。」

「係咁,我即刻去揾阿慧,畀新月棒佢睇咪得?」我未等露娜回覆,已急不及待WhatsApp畀阿水叫佢幫我約阿慧。

「哇,叫你揾木星戰士你就慢吞吞,揾阿慧就咁高效率?」露娜不屑咁望住我。

「梗係啦!交配緊要……吖唔係,生兒育女,延續戰士身份緊要吖嘛!」我話。

過咗兩日,喺阿水嘅幫助下,我終於約到阿慧出嚟見面。

「阿慧!」我向住喺街上等我嘅阿慧跑去。

「你……你就係滿叔叔?」阿慧水汪汪嘅大眼精望住我。

「吓?叔叔?」我唔多鍾意呢個稱呼。

「哈!對唔住,滿哥先啱。」佢似乎睇出我嘅諗法,真係一個善解人意嘅女仔。

「嗯,唔緊要啦,都係一句啫。」

「水哥同我講咗,嗰日你都有份救我,所以,今日畀我請你食飯吖。」阿慧話。

「哈!咁又唔使,其實我今日約你出嚟,係想……」我邊講,講伸手入褲袋。

「想做乜呀?滿哥?」

「我想畀我碌嘢你望下。」

「變態!啪!」阿慧兜嘢摑咗我一巴。