尋日去炒散搬貨,我執咗隻黑貓返屋企


21. 2.0

日期:2017-04-05

隻柒柒柒本來瞓低咗,突然典下典下咁爬起身話:「可惡,竟然整爛我2.0 嘅軀體?」

「喂!佢未死呀!」我大聲鳩叫。

「惡靈退……」火仔想出招,但因為啱啱出完,元氣大傷出唔到住。

柒柒柒突然伸直右手向天,一道黑色嘅氣由個天衝落到佢手心。

「仆街啦,如果呢個時候佢出招,我哋死硬。」我邊講邊向後退。

「唔怕。」棟你個篤一臉淡定:「你哋睇下佢嘴角流晒血,佢應受咗重傷。」

柒柒柒抬高頭大叫:「等我返去造個3.0軀體,再返嚟收復你哋!」佢一講完,團黑氣就捲住咗佢,將佢帶上空中消失咗。

望住廟入面瞓晒喺地嘅人,火仔好緊張咁撲去火老伯身邊:「老豆!快啲起身呀!」

「等陣呀,火仔。」我叫停咗佢:「我哋變返身先,如果唔係,火老伯醒咗會以為我哋係人妖。」

就係咁,我哋變返身做正常人之後,就逐一叫返醒佢哋。

「火仔,點解我會瞓咗喺地下嘅?」火老伯一醒返就問。

「噢,頭先突然有啲不明氣體,你同好多善信都暈咗,不過而家冇事啦。」火仔話。

「哇!我哋逢凶化吉,吉人天相,真係要還神先得啦!」旁邊個師奶咁講,然後其他善信都爭前恐後咁仆去拜神。

「大家記得添多啲香油呀!」火仔大叫然後改為細細聲咁講:「今次發啦。」

「火仔,轉頭請我哋食飯啦。」我拍一拍佢膊頭。

火仔轉身同火老伯講:「老豆,我同啲朋友出去食飯傾偈呀。」

「去啦去啦!」火老伯話。

我哋去到逸東村間譚仔坐低,先得閒互相認識。

「火仔,你記唔記得前世發生嘅事?」金城有問。

「對唔住,我只記得自己係火星戰士,至於你哋……同埋前世發生嘅事,我都冇乜印象。」

「唉,而家我哋在座有月光公主,重有金星、水星戰士,加埋你火星戰士,我哋只要揾埋木星戰士就可以集齊力量,咁先有機會對打黑暗帝國。」阿水話。

「黑暗帝國?就係頭先隻嘢?」火仔話。

「冇錯,上一世我哋嘅月亮王國已被佢哋毀滅,而家佢哋又嚟搞地球,我哋唔可以袖手旁觀。」金城有話。

「咁我哋要去邊揾木星戰士?」火仔話。

「木星戰士嘅特質係烹飪叻同埋大力,而且個名應該有個『木』字,我哋依呢個方向揾啦。」阿水話。

正所謂,緣份嚟嘅時候,要擋都擋唔住,喺未揾到木星戰士之前,我竟然先揾到嗰個命中注定屬於我嘅女人。