尋日去炒散搬貨,我執咗隻黑貓返屋企


20. 火星戰士

日期:2017-03-31

「嗚呀!」火仔被我射中,大聲咁叫咗出嚟。

「死啦!我係唔係炸死咗火仔?」我低頭想問露娜或者棟你個篤,但佢哋都唔見咗。

前面煙霧彌漫,金城有同阿水冇理會我同火仔呢邊嘅情況,繼續殺咗唔少嬲嬲小妖。

當眼前嘅沙塵散去,我見到露娜同棟你個篤行出嚟,中間亦有一個身影半蹲喺度,係火仔!火仔被我打中,竟然冇瞓低。

「我記得啦,我係火星戰士。」佢擺咗個好有型嘅姿勢,然後一路講一路抬起頭。

「點解會咁嘅?太好啦!」我頭先真係嚇到飆屎咁滯。

「好彩你射中佢時,我已令佢覺醒變緊身,戰士變緊身時係唔會受到任何傷害。」棟你個篤解釋。

「咁勁?咁有妖獸時,我不停變身咪一定死唔去?」我好興奮咁講。

「公主啊!你用下個腦啦!變緊身死唔去,但又發動唔到攻擊,最後其他人死晒得返你一個又有乜意思?」露娜話。

「重有,月亮戰士,請你練下眼界,你頭先差啲殺死火星戰士。」棟你個篤冷冷咁講。

「Ok ok....咁而家我哋繼續打爆啲嬲嬲先啦。」我話未講完,就聽到火仔大叫:「惡靈退散!」

睇嚟佢急不及待出招,只見一道道黃色紙符飄出嚟,貼住啲嬲嬲小妖嘅額頭,然後佢哋就神情痛苦咁氣化晒。

「掂過碌蔗呀!」我大叫,但同時又有把聲大叫:「嬲嬲上鼻!」係柒柒柒把聲。

隨住佢叫完,地下又湧出更多嬲嬲,又堆到上好高。

阿水大叫:「大家,原來我哋殺死啲嬲嬲都冇用,我哋要阻止柒柒柒出招!嚟啦,皂泡紛飛!」好多藍泡泡飛去柒柒柒度。

「愛神維納斯鎖鍊!」
「月光昇華洗禮!」
「惡靈退散!」

我哋出招嘅叫聲此起彼落,柒柒柒成個身畀我哋打到飛開咗九丈遠,周圍嘅嬲嬲小妖都突然冇晒!

「勁呀!我哋打贏咗!」

正當我哋以為柒柒柒已經死咗嘅時候……