尋日去炒散搬貨,我執咗隻黑貓返屋企


19. 柒柒柒

日期:2017-03-30

隨住個黑影大叫「嬲嬲上鼻」,我見到每個人企嘅位置,喺地下都有一堆嬲嬲樣嘅圓形小妖湧上嚟。

「嬲嬲!嬲嬲!」啲小妖係咁叫。

我眼前嘅小妖,不知不覺間已湧到上我個鼻,我嘅煩躁莫名其妙咁去到極點,相信其他人都一樣,覺得好嬲,但唔知嬲乜春。

「阿滿!快啲匿埋喺人群後面變身啦!」露娜一嘢跳上嚟抓住我個頭,令我好似肥貓轟頂咁醒咗一醒。

我拎碌棒出嚟,細細聲講:「變身。」

雖然我聲量細,但變身嘅動作依然係浮誇嘅,我就喺人群後面剥光豬,然後又剃毛又跳舞咁,變成咗月亮戰士。

「何方妖獸?令所有人無啦啦嬲嬲?」我大叫,我望一望金城有同阿水,佢哋見到我變身後嘅樣都當堂醒咗,懾緊埋一二邊去變身。

「ChaChaCha!」隻黑影跳住ChaCha,裙擺飛揚咁走出嚟。

「haChaCha》」佢大叫。

「Cha咩鬼嘢?報上名來啦!」

「我哋係金星同水星戰士!」金城有同阿水都變咗身,喺我身後大叫。

我擰轉面:「唔係叫你哋報上名來,我叫跳緊ChaCha嗰隻嘢。」

「ChaChaCha!呢個就係我個名!」隻嘢話。

「ChaChaCha?咁你真係好鍾意跳舞,妖如其名呀。」我話。

「唔撚係ChaChaCha! 我係柒柒柒!」隻嘢大叫。

我終於聽清楚佢個名,忍唔住話:「頂,好改唔改,改個名叫柒柒柒?」

「廢話少講,唔好阻住我收集怒氣!」佢冇理我哋,伸手一揮,只見火老伯、火仔同班師奶全部突然變得好虛弱咁,個個暈低晒,然後有啲紅色嘅氣體由佢哋身上飄出,繼而被嗰啲嬲嬲小妖吸收晒。

「弊啦!佢吸晒班人嘅怒氣,作為黑暗帝國嘅能源呀!」棟你個篤突然喺金城有個手提袋跳出嚟。

「咁點算呀?」我問,但係冇人答我,只見金城有大叫:「愛神維納斯鎖鍊!」佢條金色嘢就一嘢飛去堆嬲嬲小妖度,有十幾個小妖畀佢打爆咗,爆咗之後,啲紅色怒氣又走返入啲人度。

阿水有樣學樣,出動佢啲藍泡泡去打爆啲嬲嬲。

「哦!原來咁做!」我拎碌棒出嚟:「月光昇華洗禮!」

激光由碌棒射出嚟,點知呢個時候,原本瞓咗喺地嘅火仔突然爬起身,然後被我個絕招射中咗。

「唉!今次仆街啦!射鳩錯咗……」