尋日去炒散搬貨,我執咗隻黑貓返屋企


18. 火仔

日期:2017-03-29

「火仔!有人揾你!」火老伯擰轉頭大叫,廟入面啲人當堂望晒過嚟。

「哇!金城有呀!」一班師奶見到金城有好似螞蟻嬲蜜糖咁,瘋狂咁衝過嚟。

「幫我簽個名吖!我想影相呀!」班師奶話。

「好好好!逐個嚟!」金城有成個明星咁……呀!唔係,佢真係明星嚟。

我同阿水被啲師奶推開咗。

「唉,佢又唔戴口罩唔戴黑超,都係想畀人認出啫。」我話。

「哈哈,重好啦,佢引開晒啲人,我哋可以揾火老伯個仔。」阿水話。

說話都未講完,一個阿叔就喺我哋面前出現,驟眼望下個樣有幾分似後生少少嘅許紹雄。

「你哋揾我有咩事?」原來佢就係火仔。

「你係火仔呀?係咁嘅……」當阿水同佢講嘢時,我就放露娜出嚟畀佢望下火仔係唔係火星戰士。

露娜望住火仔,忍唔住好開心咁大叫咗一聲:「係你啦!」

「嗚呀!隻貓……」好明顯火仔聽到露娜識講嘢,所以嚇親。

但我哋未嚟得及解釋,後面金城有前嗰班師奶突然好嘈。

「個簽名咁核突,你去死啦!」

「你真係勁樣衰,唔好同我合照。」

唔知做乜頭先對金城有好熱情嘅師奶突然變到好嬲,有啲甚至想郁手打金城有。

阿水衝上前想阻止佢哋,我就大叫:「唔好咁嬲!金城有,你係唔係非禮班師奶搞到佢哋咁嬲?」

「唔係呀!佢哋突然……」金城有未嚟得切解釋,連火仔同廟外嘅火老伯都突然怒氣沖沖咁走入嚟。

「你哋又嬲乜?」我忍唔住大叫,同時,唔知點解我突然都好嬲金城有,嬲佢成日串鳩我。

「夠啦!你哋想點?」阿水好嬲咁大叫。

「阿水,你咪愈忙愈忙!」金城有亦顯得好躁。

「有妖氣!你哋要冷静心神,唔好被妖氣控制你嘅情緒呀!」露娜大叫。

幾乎同一時間,我見到有個著裙嘅黑影閃咗入廟,個黑影好有氣勢咁大聲叫:「嬲嬲上鼻!」