尋日去炒散搬貨,我執咗隻黑貓返屋企


17. 阿慧

日期:2017-03-28

兩日之後,我喺東涌商場對開嘅噴水池等金城有同阿水,好多小朋友喺噴水池濕晒身咁玩緊。

「唉,點解我嘅童年冇咁開心嘅?」我自言自語。

「公主,唔好望返轉頭,我哋要望前面。」露娜喺背囊細細聲講。

「知啦……」

「阿滿!」阿水同金城有終於嚟到,我哋轉巴士向石門甲出發。

「阿水,上次跳樓個女仔點呀?」我問。

「噢,你指阿慧?佢嗰日去到醫院就醒返,話見到鬼所以暈咗,我見佢冇乜嘢,佢啲屋企人都嚟咗,所以我都好快走咗。」阿水停咗一停又講:「不過阿慧好多謝我送佢去醫院,所以我哋都交換咗電話,佢話日後揾我食飯喎。」

「嘩!衰仔你有艷福啦!」金城有話。

「咪住先,阿水,你話個女仔叫阿慧?」我唔知點解突然覺得「阿慧」呢個名好熟。

 「係呀。」阿水話。

「阿滿,你係唔係記得啲嘢呀?」金城有問。

「吓?我記得……啲咩?」我係記得啲嘢,但又唔知自己記得啲咩。

「阿慧呢個名,你係唔係覺得似層相識?」金城有話。

「你咁講起……我好似記得……」阿水望住金城有,金城有點咗下頭。

「喂?即係咩呀?你哋講乜春?點乜春頭?」我問。

「你前世係月光公主,你嘅男朋友係地球王子阿衛。」金城有話。

「阿衛?阿慧?咁阿慧會唔其實命中註定係我條女?」我諗起都覺得興奮。

「你都short嘅!呢個世界咁多女人叫阿慧、阿惠,唔通全部都係你條女?」金城有又喺度潑冷水。

「唔係喎!我嗰日喺天台見到阿慧真係勁有feel架喎!」我話。

「你咪發姣啦!」連阿水都忍唔住話我。

我哋吵吵鬧鬧落車,又嘈嘈閉咁行去寺廟,沿路都有唔少行山人士,終於見到火老伯企咗喺寺廟門口。

「火老伯!」我大叫佢。

「喂,乜你哋又嚟揾我呀?」

「唔係揾你,想揾你個仔。」

「揾火仔?佢喺廟入面呀!」