尋日去炒散搬貨,我執咗隻黑貓返屋企


16. 火老伯

日期:2017-03-27

「你……你係火先生?」我口都震埋。

「係呀!」佢細細聲講。

「你……你係廟祝?」輪到金城有口震。

「係呀!」佢又再細細聲答。

「喵!」我背囊入面嘅棟你個篤同露娜喺度叫,我知佢哋想我放佢哋出嚟睇真啲。

「阿……阿火老伯,你幾多歲?」我一邊問一邊除低背囊。

「我七十幾歲囉,你哋係唔係揾我架?有咩貴幹?」

我將背囊擺喺地下,拉開拉鍊,露娜同棟你個篤都伸咗個頭出嚟望住火老伯。

「呵呵呵呵!呢兩隻嘢又幾得意喎!嚟同伯伯玩下啦!」火老伯半彎身伸隻手出嚟想撩露娜,點知露娜同棟你個篤擰擰下個頭捐返入個背囊。

睇佢哋反應,就知道火老伯唔係我哋要揾嘅人,我同金城有都不禁鬚一口氣。

「呵呵呵呵,唔同伯伯玩呀?」火老伯擰轉身嘆咗一口氣:「不過我都慣咗一個人,冇所謂啦!」

「火老伯,點會呢?你係廟祝,應該成日都有人嚟拜神兼揾你傾偈啦!」我話。

「後生仔,你都見到架啦,傾咗咁耐,都係得你兩個人,今日又唔係假期,冇乜人行山經過,邊有人睬我吖。」佢摸咗下自己頭頂啲白頭髮,又講:「我都老啦,樂得清閒都好嘅。」

「火老伯呀,咁你啲屋企人呢?」金城有問。

我立即將金城有揾埋一邊,細細聲話:「喂,你咁問火老伯嘅,你見佢一條友喺度,分分鐘係冇人冇物,你咁問會勾起佢傷心事。」

「嗨!後生仔。」唔知幾時,火老伯企咗去我身後,兼且聽到晒我講乜。

佢拍一拍我膊頭話:「後生仔,你心地都幾好,不過唔使擔心,我有個仔同你哋差唔多年紀,佢好有孝心,個個星期六日都返嚟陪我,幫手打理間廟架。」

「你有個仔?」金城有雙眼直頭放光。

「係呀。」

我開心地問:「你個仔係唔係姓火架?」

只見火老伯突然粒聲唔出,個頭頂好似嬲到出煙咁,過咗一陣先話:「你都懵嘅,我個仔唔姓火唔通你姓火呀?」

「係嘅係嘅。」我邊回應邊諗:「點解老豆老母生得我咁蠢。」

「咁即係如果後日……即係星期六嚟到,我哋就可以見到你個仔?」金城有問。

「係呀,呵呵呵!我個仔有你咁靚仔架!」

向火老伯告別後,我哋決定等星期六同埋阿水再嚟,但我哋點都估唔到,等緊我哋嘅係一場戰爭。