尋日去炒散搬貨,我執咗隻黑貓返屋企


15. 大嶼山

日期:2017-03-24

「要去邊揾火星戰士?」我同金城有好快落到大街。

「你知唔知有人係姓火?」

「姓火?有冇可能呀?」我話。

「火係一個好罕有嘅姓氏,我同阿水循呢個方向揾,知道喺大嶼山寺廟嘅廟祝係姓火嘅,所以我哋而家就入大嶼山。」

「吓?去大嶼山?唉……如果係女仔一齊去就好啦……」我自言自語。

金城有揸車載住我入到東涌,因為有啲路揸私家車唔畀入,所以我哋就轉大嶼山巴士向一個叫石門甲嘅地方進發。

講真尋晚成晚冇瞓,而家又坐咗咁耐車,真係頂唔順要喺車度瞓一陣。

但好似只係合埋眼咗一陣,金城有就拍醒我話落車,於是我哋就喺一個人影都冇隻、樹多過人嘅地方落咗車。

「哇!咩地方嚟架?」我話。

「依據地圖應該係行呢條路。佢」指一指右面嘅一條小徑。

我哋沿住小徑慢慢行,雀仔喺頭頂飛過,樹葉被微風吹到沙沙聲,成個環境都好舒服。

「公主呀?」行前面嘅金城有冇擰轉面,但輕聲咁叫我。

「平時咪叫我公主,我叫阿滿,叫我滿月都得。」

「阿滿呀?」佢改口叫我。

「咩料?有屁快啲講。」

「你頭先喺天台做得好好。」佢突然用好平淡嘅語氣講。

「吓?」其實我真係唔識畀反應,喺我有記憶嘅三十幾年人生入面,從來冇得到過任何稱讚。

金城有繼續行,冇轉身望我咁講:「我話你頭先做得好好,畀克儉獸嘅生涯規劃射中,雖然有迷失一陣,但好快就恢復過嚟,唔係咁容易架。」

「唓!我點會走去死先得架?你哋話架嘛,一陣我死咗又連累你哋,我真係唔知點算。」

金城有終於擰轉面話:「公主,我知道終有一日,你會帶領我哋成功守護最重要嘅人同地方。」

「金城有……」我又開心又尷尬,以至於一時間都唔知講咩好。

過咗一陣,我轉移話題問:「係呢?間廟到底喺邊架?」

「唉!你果然冇變,一樣咁懵,我哋咪到咗囉!」

我望一望,原來十步以外有間好細好細,可能重細過我住間單人公屋嘅廟,旁邊重有間小石屋。廟外有個阿伯喺度掃緊地,我哋立即行過去問:「我哋想揾呢度個廟祝火先生呀!」

「我咪係囉!」眼前已一頭白髮,瘦弱到可能跑步都跑唔郁嘅阿伯話。