尋日去炒散搬貨,我執咗隻黑貓返屋企


14. 戰爭

日期:2017-03-23

新月棒射出嚟嘅激光一嘢轟落克儉獸身上,但佢就避都唔避硬食。

「真係笑你戇鳩驚你嬲,頭先你咪試過囉!呢一招對我一啲用都冇。」佢笑住講。

佢講得冇錯,佢正面承受咗我嘅攻擊後,的確毛都冇甩一條。

「點……點算好呀?」我喃喃自語。

「愛神維納斯鎖鍊!」金城有又大叫,一條金黃色嘅鎖鍊喺佢手上射出嚟。

「嘿!」克儉獸一嘢跳高,然後竟然徒手接住條鎖鍊,再大力拋返轉頭。

「呀!」金城有差啲畀佢掟中,但就係呢個時候,一堆藍泡泡飛去圍住咗克儉獸!係阿水嘅絕招!

「嗚啊!」克儉獸發出慘叫。

「機會嚟啦!公主,我哋一齊出招啦!」金城有大叫。

「月光昇華洗禮!」

「愛神維納斯鎖鍊!」

我同金城有同時發出攻擊,射向克儉獸。

「轟呀!」當飛揚嘅塵土散開,只見克儉獸受咗傷咁坐咗喺地下,但係……後面重多咗個身影……係玉娥獸!

「喂,多咗隻嘅!」我大叫。

「我哋唔得閒同你哋喺度玩,克儉獸,我帶你走。」玉娥異常溫柔咁攬住克儉獸,然後兩個人嘅身影慢慢淡化,最後消失。

「佢哋次次都剩係識走!」金城有忿忿不平咁話。

「但係如果佢唔走,我哋又出咗咁多次招,身體太攰,未必可以應付到佢哋兩個。」阿水好冷靜咁講。

我已冇心思聽佢哋講乜,轉身跑返去個學生妹身邊,係咁拍佢膊頭:「醒呀!醒呀喂!」

呢個時間,金城有、阿水、露娜同棟你個篤都圍咗過嚟望住個學生妹。

個學生妹慢慢擘大眼,嘩!原來佢對眼勁大勁靚,好似收埋咗個宇宙喺入面咁,我不禁望到呆咗。

佢好迷茫咁逐一望我哋三個人,突然好驚咁大叫:「人妖呀!」

佢……又暈咗。

「喂,而家啲後生女咁脆弱嘅?」金城有話。

「唉!我哋變返做平時個樣先啦,又真係幾恐怖嘅……」阿水講。

等我哋三個變返身之後,我話:「不如我送佢返我屋企先啦,我會好好照顧佢。」

「你送佢?你頭先喺度用眼神強姦咗個學生妹,你估我睇唔到?」金城有指住我個鼻話。

「邊有啲咁嘅事,你睇錯啦!」

「咁啦,我送佢去醫院啦。」阿水話。

「嗱!阿水送佢我就好放心。」金城有話。

「挑!重好,我返歸瞓覺。」我冇理佢地,轉身就走。

「就快天光啦,重瞓咩呀?我哋有頭緒去邊搵火星戰士,公主你跟我嚟啦。」金城有一手扯住我衣領話。